Benjong nung shisabolu

Benjong ya tepela mapang lir saka pelanüaka mepelatettsüsa taküm aser kibong aika alitsüa akok. Ibaji talisa senotsü makaba ajanga asütsü. Atangji, benjong amongtsü asoshi senotsü aika nüngdaker, kechiyong benjong nungbo chiyongtsü tajung achitsüla, süoshi tasen asemtsüla, kiojena topur junga yanglushitsüla aser tangar nema sempet agütsütsüla. Item nüngdaktem ajakji atalokdi asüdangbo sen aika nüngdaker. Ano, talisa nübener kibongtem asoshibo tebilemtsü tulu kechiyong ajak nem  akujema pei aginütsü süoshi aser osettsüset alitsüdang sen aika akayonga meperir. Iba ama benjong mapang shisabolu ajurudang tsüraburtemi tanurtem den kanga shisakaa o tanep agi jembitsübaji kanga tongtibang asütsü. Tsürabur aikati tanurtem dang kibong nung makamait aser timtemba indang memetetdaktsür. Ibayongji, tanurtemibo tsüraburtem ket nungbo parnok nüngdak ajak peritsütsüsa kar amato bilemer. Ano, tsürabur o tanur na prongla atema lendong kaji tsüraburtemi pei tanurtem matsüngdang takar amato jembia sayur aser benshir, anungji tanuri pa nüngdak asoshi shisabolua mebilemer. Ibaji tanur tarutsü taküm asoshi kanga lendong lir. Kibong nung makamait timtem aser sen aatsü asoshi mapa inyakba indang tanurtemi memeteti aienba tanur jagi mapa meinyakyonga senotsü angur aser mapa meinyakyonga chiyongtsübosa angutsü ta zübazübaa bilemtsü. Iba ama zübazüba bilema-bilema mapang tatsüka tsüngda takidak maka küma aoba tanurtem aika asenoki ajurutsü. Taküm nung shisabolu ya tongtibang shilem ka lir. Takok aser tajung ajak shisabolu ajanga angur. Aji oda, kibong nung tsüraburtemi tanurtem den shisabolu khuret lemsateptsübaji tang ama benjong mapang ya tajung asütsü. Asenok tsüraburtemi tanurtem chiyongzüker külen tebok süngjema amendang mesüra sarasadem mapang agidang, asenoki anogo mesüra ita nung aaba sen aser asenok nüngdaktem indang jungjunga rasaa ashitsübaji kanga tongtibang lir. Itemji tanurtem nem mangatetdaktsüi tanurtem aginüba mataloktsüra tanurtem jagi tsüraburtemiang memeim südi ta bilemtsü. Iba jagi tsüraburtem o tanurtem na tetsüngda raksar aser tanurtem taküm raksar. Ajisüaka, kodang tanurtemi pei tsüraburtemi anogo mesüra ita nung aaba sen jenjang aser parnok mapa inyakba tia indang jungjunga angatetdir, parnoki tsüraburtem dang sen talila meshitsübajibo yutsür parnok nüngdak asoshia memeshitettsü. Asenoki tanurtem aienba aser nisung tajung akümba purtem indang reprangdanga shisadangra, parnok teimbaka sensaker kibong nungi adokba purtem asütsü. Item jagi parnok tsüraburtem parnok mesüdang aser parnok azüngdang koma timatem aji meteta lir. Ajisüaka, ano asenoki sensaker kibongtem nungi adokba  purtem, shirnok tang jenjang tajung nung lir, parnok tia indangji bilemdangra, parnok aikati pei tsürabur kibong nung timtema intetba anogotem amadoker ngasangatema aienba angutsü. Jenjang tajung nung rongsen  madak kecha shisabolu maka tsüraburtem ngasangatemer asünungji tanurtembo tsüraburtem dang nungi tamajunga akümer. Iba jagi asen kin rongnung aikati pei tsürabur senmang mamangtetter. Ibaji tsüraburtemi pei chirnurtem shisamebuludaktsüba ajanga lir. Shisabolua bilemba agi tangaribo shiranger asoshi mozü yanglutet, alu nung tsük aika arotsü asoshi mozü agi ali temo kümer amshitsü bushitet aser anüngdak ayimtsü tayimtsü aser ali nung senzütsü gari yanglutet. Shisabolua bilemba agi, pei yimtsür-yimer, kidang- kiyonger aser nübortem ajurua shisalemsateper aser sarasadem ayongzüker. Iba jagi alima tajungba küma yanglur. Aji oda, benjong mapang nung pelateptsü melen shisabolubaji tangatetter atemabo tajung aser temoatsü dang asütsü. Tanübo shisabolur saka asüngbo tepela arutsü. Iba ama shisaboluba mapang asenoki taginüba ajak alitsü memerangi kechi nüngdak, itemji asen akaba yari alira, iba jagi asen shisaboluji akoktsü. Item ajak nungji tanurtem nem  shilem agidakja inyakra, tanurtemiang kibong khuret bener benjong pelatepa amongtsü.