Benjong sapuba Jack !

Asen lima agi benjong lima küma amongba ya junger, kechiyong benjong nungbo mapa meinyaki shi ango den chiyongtepa pelateper. Ashiko, ibaji kotak lima danga tajungba asütsüa akok kechiyong kotak nungbo shi ango mangutsü aser mechiyongtsü kechiyong mayatsü ta ashir. Aji oda, tang Kisama nung amongba Hornbill benjong ya dang masü saka asenok sobaliba benjong dak alaka asenoki asenoksasa ayongzüka amongba benjongtem zünger mezüngma, kenten benjong, saisapong benjong, aonsutsü benjong, süngjanglijang benjong aser ano tangbo süngküm (bamboo) benjong dena amonger. Atangji, benjong amongba nungji kecha tai mali aser tepelatsü dang keta lir. Ajisüaka, mapa –mapa dang inyaker, anisüngzük aser asayatsü nung kenyongi mapang magütsüra, iba jagi Jack-baji sowar akümer ta shin nung ashi ama, benjong-benjong dang amongba agia Jack-baji sensakpu akümtsü. Ano ajisa tamajungba. Tanü Naga nunger Jack-baji mapa-mapa dang inyakba nisunga masü saka küm piyong benjong-benjong dang monga jajaba Jack-baji asütsü. Aji oda, taoba küm ishika benjong-benjong dang monga arur, tangbo asenok shitakba sobaliba benjong Moatsü aser Tsüngremmong amongtsübo kecha maka, nashi ak tepseta amongtsübajibo yutsür, shi seret kata alia benjong memongtetba kin aser kibongji asenok kümogo. Ashiko, asenok aika Christmas benjong amongtsüa asoshia kecha maka shisabolua alitsüa akok, kechiyong asenoki benjong mongner dang ashi asenoki benjong amongtsü asoshibo kecha meinyaker. Aji oda, asenok taoba küm ishika benjong monga-monga mapa inyaktsü amadokogo. Ibayongji, asenok benjong paikaya mongaka tetezü maka akümer, kechiyong kecha makaser aputepa benjong amonger. Shitakba agibo, benjong yabo takar mapa, anungji benjong amongtsü asoshi akatsüla aser akatsü atema mapa inyaktsüla. Ajisüaka, asen lima nung tangar dang tenla meshia bendanger dang ak , jangotsü aser metsü mersü ajak alia benjong amongba ya takar mapa masü saka alartem kibur dang nungi sen apua benjong amonger amai asenoki bilemdi. Benjong shia ya mapa dak sendaka lir, anungji kechi mapa sayua asenok benjong amongtsü ? Ibayongji, Nagaland nung aonsutsü aser süngjanglijang benjong amongyonga, benjong monga pelateptsüsa asen lima nung aonsutsü aser süngjanglijang züsentetba mangur. Aji oda, Ngaland nung yongsen aser teka agi tapu balala yanglutetba benjong among nunga, ashiko, asenoki yanglutetba osettem dang nungibo Assam nungi alia bener aruba osettemang teimba sayua benjongteptsüa akok. Kasaji, Nagaland nung süngküm benjong amongyonga, süngküm agi yanglutetba osettem bener arua pelatepa amonger masü, teyanglutetbabo kecha maka ser süngküm benjong tenüng nung kentena aser chiyongtepa benjongtepba agibo Jack-baji sowar-ang akümtsü. Aji oda, mapa mapa inyakba agi jack-baji sowar makümtsü aser benjong-benjong amongba agia Jack-baji mesensaktsü atema, asenokbo benjong ya temer külen, khen jungjunga süngjemshir benjong amongba tetezü aser benjong amongtsüba nükjidong indang bilemdangtsüla. Atangji, loktiliba nung aliba taküm ka asoshi benjong amongtsüba ya tongtibang, kechiyong benjong amongba mapangang Tsüngremi moatsüba aser asenoki inyaktetba mapatem indang tali jangjar. Aji oda, tsük aser jenjang menjang jen sünga bendena yur iba benjong amongtsübaji koda jangratemtsü, kasaji aonsutsü yoker meyokma aser chir mechima züsenteta yur aonsutsü benjong ampngtsübaji koda tajung, kasaji süngjanglijang onger meongma aser yoker meyokma kurepa tanga yur süngjanglijang benjong amongtsübaji koda tepelatsü aser iba amaji süngküm agi yangluba ki nung süngküm agi yangluba oset tapu balala yoka benjong amongtsübajia jangratemtsüka asütsü. Iba tangatetba nung asenoki Moatsü, Tsüngremmung aser Christmas amongtsü asoshia mapa meranga inyaktsüla. Tanü asenoki apua benjong amongba aser kecha makaba agi benjong memongtetba ya asenok asoshi sobaliba nung tamakok dang masü maksü lir.