Benjong ya agütsüyaba aser putepshiba mapang lir: C.L John

Tongti tesemdanger C.L John den par külem medemer aser benjongmungertemi akhi asen tsürabur yimya nung meyu-meyua yimdong süa ‘sangzü’ atsür aruba mapang tangokba noksa nung angur. Longsa, August 2, 2016

Longsa, August 2 (TYO): Mongolbarnü Longsa yimtak Tsüngremmung sentong tuluka ayongzüka mungogo; Iba sentong nung kishikina yim aser jila balala nungi benjongmunger aika adenshia longsotepa amung. Sentong nung R.D & REPA minister, C.L John tongti tesemdanger jaoka meraketa munga liasü.
Tsüngremmung dang ya Longsamung taka aikati jembir, aser ibai Longsa yimtak küm shia benjong tulu ayongzüka amunger. Tongtibangsa taoba küm ishika jakdang nungi Longsa Tsüngremmung sentong ya raliwalir puadaktsüba maparen ka ama agizüka tourism department den yaritepa Longsa yimteni ayongzüka munga arudagi.
Tanü iba sentong nung tongti tesemdanger C.L John-i jembidang, benjong ya agütsüba/agütsüyaba mapang, putepshiba aser taitoktepba mapang ka lir, ta ashi.
“Benjongtem ya linük ka asoshi tongtiret ka lir, benjong melira linükjia malitsü,” ta pai ashi.
Benjongtem ya Tsüngremi agütsüba lir, anungji benjongtemji chichiba Khristan tanela nung Tsüngrem dang temoatsü meshia amungtsüla, ta paisa shisem.
Tanü Naga nunger lokti tia indang sasaseta jembidang, telungjem maliba den kin tejak repranga inyakba, telungpur telok aika akümba indang kar ashi. Tanü asen lokti nung telemsa adokba ya asen tsüraburtem tai masü saka asenok (tang alirtem) tai lir, ta ashi.
“Lokti nung telemsaji asenoki adokdaktsü, anungji telungjemjia asenoki dang bener arutsüla,” ta paisa ayongzüka liasü.
Tanü joko Nagaland nung Legislator-tembo ajak lungjemogo; süra “kechiba mulungtet telok (civil societies) aser telungpurtem melungjemteter,” ta paisa asüngdanga ashi.
Paisa Naga nunger lokti tenzüker (civil societies)-tem lungjemdaktsünüa ashidang, talisa kin shia hoho (tribal hohos) aser putu mendeni anir telungjem aser putepshiba maparenji inyaktsüla.
Tsürabur Yashimeren (tatar)-i Tsüngremmung teratet ashi. Sentong nung Tsatanger yim (Sangtam) aser Sapatomi yim (Sumi) aser yimtak telok balalai yar tsüngsang aser sobaliba kenten menü tapu balala ia sayuba ajanga tesentepertem kanga pelatep.