Benjungmong teratet angateta amungtsüla: P.B. Acharya

November 7, 2016 nü Wokha jila nung Tokhu Emong Festival nung Nagaland Angh, P.B.Acharya aser pa kinungtsü den Lotha Hoho ketdangpurtem aser tanga ketdangsertem külemi agiba noksa ka angur.

Dimapur, Nov. 07 (TYO): Hombarnü Wokha nung Lotha nunger benjung Tokhu Emong kanga longsotepa mongogo; iba sentong nung Nagaland Angh, P.B Acharya tongti tesemdanger liasü.
Iba benjungmung nung Lotha nunger den jembidang Angh-i, “Tanü asenok iba benjung amongdang aonsotsütem züsentetba atema asenoki aluyimertem dang pelaba lemsatepba den Tsüngremer temoatsü atema tenüngsang agütsütsüla,” ta ashi.
Iba benjung amongba dak sentakba Angh, Acharya-i, “Asen tetsü teboutemi meranga inyakba aser asenok nem scientific shisatsü agütsüba ajanga asen taküm nung aika ajangzükogo,” ta ashi.
Paisa, asenoki iba benjungmong teratet junga metetra asen taküm nung tetezü taliba akettsü aser tejakleni aotsü tashi angutsü, ta ashi.
Asenoka lenla ajak nung tangar den kasa tajung lir, saka tangbo asenok metetbaji asen sobaliba tsüngsang aser jilushi takar asüba yong lir, joko asen Nagaland ajungba sayatsü atema mapang tongogo, kechiyong Tsüngremi asenok nem tsüngsangtsü aser jilushi aitsü dang masü saka sempet ajak moaja lir, ta paisa metetdaktsü.
“Tsüngremi Wokha nem alima rongsen jenti moaja lir, aser asenoki iba tesem ya tajungtiba nung amshitetra ali nungi adokba item rongsen ajanga asen lokti azükarutsü. Lokti ka mesüra linük ka azükarutsü atema tongtibangtiba asemji shisaliok, electricity aser mapa anguba lir,” ta pai ashi.
Anghisa Lotha Hoho aser Hoho ajak dang, Nagaland nung teti atema yimjung asoshi tang mapang ya ajak longjemtsü mapang lir, ta ashi.
Tanep Angh-i Tokhu benjung teratet kaket ka sayaja liasü.
Kasa sentong nung Central Nagaland Tribes Council tatong Tir, O. Shilu Jamir-ia mapang tatsüka agia jembi.
Lotha Hoho-i Nagaland Angh nem temepishiba shidi ka agütsü, iba shidi nung parnoki Golaghat-Wokha-Bokajan Road ya National Highway mepsihia lir.
Iba benjung nung Treasuries & Accounts, Relief & Rehabilitation Advisor, Dr.T.M.Lotha, Executive Council Ao Senden, Rengma Hoho Tir aser tongtibang nisung aika dena liasü.