Benjungtem rongnung benjungti Hornbill tenzükogo

December 1, 2015 nü Naga Heritage village, Kisama nung Nagaland Angh PB Acharya-i Hornbill tree semzüktsübdag agiba noksa angur.

Dimapur, December 1 (TYO) : Naga Heritage village, Kisama nung December 1 nü 16 buba Hornbill Festival, 2015 tenzükba sentong nung Nagaland Angh, P.B. Acharya tongti tesemdanger liasü aser Nagaland chief minister, T.R. Zeliang-i tongti tayonger ama shilem agi.
Tanü Naga Heritage village, Kisama nung Nagaland Angh-i 16 buba Hornbill Festival nüngtem nung yangluba Hornbill Tree semzüktsü.
Sentong nung Angh Acharya-i o jembidang ashiba agi, Hornbill festival tenzükba anogo den külemi Statehood Day amunger aser iba ya Nagaland nung alirtem asoshi tepela anogo ka ka lir. Iba anogo nung Naga nungeri tesüiba mapang inyaktetbatem atema nüma tanga bilemtsüla.
Paisa ashiba agi, tesüiba küm 50 tsüngda Naga nungertemi terenlok jenti ngutetogo aser ibaji talisa education aser healthcare nung liasü.
Nagaland nung kin temeyoktep aliba aser sobalibatem wazüka ayutsü, ajungkettsü aser kümzüka ayutsü nükjidong nung Hornbill Festival ayongzüka amunger, ta Angh-isa metetdaktsü.
Kisama nung sentong balala ayongzüka agiba metetdaktsüdang Acharya-i ashiba agi, “Naga nunger kin 16 aser sub tribe temi parnok sobaliba, yartsüngsang, kentenmenü, chiyungtsü, handloom aser handicrafts tem sayur. Tang Kisama ji mini Nagaland ama lir.”
Nagaland Angh-isa, yimjung indang olen jembidang, lokti ka tejakleni aotsü aser terenlok angutsü atema yimjung nüngdaker, ta ashi.
August 3, 2015 nü India sorkar aser NSCN(IM) tsüngda Framework Agreement indang Acharya-i nenshia jembidang ashiba agi, iba tenangzüktep ajanga Naga nunger taginübatem ajangzüktettsü aser India tashi taitba akümtsü.
Naga Yimten tebilemtsü atema telemtetba tajung ka agitettsü atema Naga nunger Yimten telok ajaki yimjung olemtep nung shilem agitsü ayongzüker, ta paisa mepishia metetdaktsü.
Nagaland Chief Minister, T.R. Zeliang-i tesentepertem pelaa agizüka jembidang, taoba küm 12 tsüngda Nagaland nung alirtemi mapa balala nung terenlok jenti nguogo, ta ashi.
T R Zeliang-isa ashiba agi, Global Warming & Climate Change nung ajemdaker Nagaland state sorkari iba benjung eco-friendly kümdaktsütsü atema telemtetba agi aser iba nung ajemdaker bio-degradable materials amshitsü tetuyuba agütsüogo.
Taküm benjung lapokba sentong nung Longcheng village, Mon Angh Y. Phonlong-i benjungmung moatsü, Rev. Dr. P. Dozo-i Tsüngrem nungi temoatsü meshia sarasadem aser Tourism Parliamentary Secretary, C. Apok Jamir-i anküp tepela o jembi.
Sentong nungsa Dreamz Unlimited-i Naga nunger sobaliba dak sendakba jilushi ka ia sayu aser parnokisa Nagaland kübok district 11 indang shilem agi
Kisama nung Hornbill Festival amungba den külemi Kohima Chamber of Commerce and Industries (KCCI)-i IG Stadium nung 10-day Night Carnival aser State Music Task Force-i Hornbill Music Festival ayongzüka agir.