Benteta jembitsü/zülutsü asoshi ojang ratet kar

~ P. Wati Jamir, Retd. H.M, Tuli.

October 16, 2018 Tir Yimyim adok olemsabang nung Wb.Talitemjen Imchen-i züluba nung semloksema ojang kar bentetrateta zülutsü aser jembitsü asoshi ratet kar lemsatepner.
1. Senü aser Senzü: Ojang ana ya tetezü balala. Senü tetezü jajaba, saka senzü tetezü onzüba (sway to and fro) ta: Pa yinzü apu nungji jajadang apuji onzü/senzü.
2. Senpet aser sempet: Ojang ana ya mesükteper, saka mezüngbuba ojangji sempet ka den dang apet. Sempet tabu aika lir. Item rongnung komala sempet asoshi sen agütsür iba sen agütsüba senpet (cash award/cash prize) sen sempet/senpet sen agütsüba asoshi amshiba nung kanga mazü masü.
Saka tanga sempettem asoshi sempet melen senpet ta mamshitsüla.
Iba ojang shibai buratet, ni memetet, saka school nung class 5 Ao tazüngtsü kaket 2016-2017 lesson 3 nung yamai angur “Dobashi Lendiba nem item senpet agütsü: (1) Kor kesübotsü den nisung ka. (2) Soshi (3) Prangpong ka (4) Bi-cycle ka (5) Yipten ka (6) Kongki ka.
Ojang ratet nung senpet tetezü teyari angati agütsüba ta lir.
Itemji senpet masü saka sempet agütsüba. Senpet ojangji amshinera sempet sen agütsüba nung amshi tapetba.
Tanabuba ojangji tenük aki anguba oset aser shirurutem ajak asoshi apetba ojang lir. Itemji ano sempet kar asenoki kongshitsü/angutsü makokba sempet lir (Abstract) ta: Sayutsüngitsü sempet, ken atentsü sempet, asayatsü sempet yamaji zünger mezüngma sempet tajung aketer lir. Item sempettem asoshi senpet ta amshitsü mapet.
Anungji koba/kechi konang mesüra temeim mapa asoshi südir süang, ajak asoshi tapetbaji sempet ojang den amshiba tajungba.
3. Lenmang aser lemang: Iba ojang ana ya tetezü mesükteper saka mezüngpubaji tenük agi anguba (concrete) aser tanapubaji tenük aki manguba lemang. (Abstract)
4. Lemang tetezü yim ana tsüngta/ alima ana tsüngta cari lenmang/tetsüng lenmang, ta: Kohimai aoba lenmang, alu lenmang, tzübo lenmang, cari lenmang/tetsüng lenmang. Item ama dang lenmang ta jembir.
Saka kodak lenmang mesüra molomi lenmang ta mejembir. Yamaji tanapuba ojangji (Abstract) asenoki tenük aki manguba oset ta: Yimjung lemang bushi, saka yimjung lenmang bushi ta masü.
Tawatanü item ojangtem tera boloa amshia anguba den tongtibangsa school nung azüngtsü kaket zülurtem aser oshi tesayurtem (language teacher) asoshi teyarir ka ama olen kar lemsateper.
Tatem.