Berdych-i Shenzhen Open takok marok agizükogo

Beijing, October 05 (Agencies): Czech Republic nunger tennis asayar, Tomas Berdych-i Spain nunger Gillermo Garcia-Lopez madak final asaya koka Shenzhen Open tebur singles shilem indang takok marok tanü Hombar nü agizükogo.
Tan asayamong nung temaba jenjang abensang, Berdych-i points 6-3 7-6 (7) ngua Lopez final asaya nung tsükdaktsü.
Arishi küm 30 tain Berdych-i tan akokba ya densema tennis asayatsü tenzüker tanü tashi nung ATP takok marok 11 buba agizüker lir.
Taküm ayonga asayaba Qatar Open, Rotterdam Open aser Monte Carlo Masters final nung tamakok ajuruba yong Berdych-i yaküm Stockholm Open takok marok agizükba sülenbo tan mezüngsüa ATP takok marok agizüker lir.
Berdych-i tanü asaya nung points 5-2 ngua temaba jenjang nung alidang tzünglu kanga sashia aruba yong tanü final asayaji minute 45 shi anena atatsüsa aküm.
Tesülen, Berdych-i points 6-3 ngua mezüngbuba set-ji kokadok saka tanabuba set nung points 1-3 ngua tekübokba jenjang nung ang asayateta liasü.
Ajisüaka, Berdych-i tatem nungbo points 7-6 (7) ngua tanabuba setjia koka tanü takokbaji angu.

You must be logged in to post a comment Login