Berlin: Nisung 12 tsükset; 48 shi yirutsü

Berlin, December 20 (Agencies): Germany yimtiba, Berlin nung tentetba Christmas shishilembadak nisung kati truck gari ka anir, nisung 12 tsüksetba den nisung 48 tashi yashi, Hombar nikongtsütsü yirutsüba osang jangjaogo.
Berlin nung tentetba tongti tesem, Kaiser Wilhelm memorial church anasa tan lendongji atalok aser tan lendong nung yirur rongnung parnok nisung 18 tashi kanga mejungi yiruba osanga angazükogo.
Tan lendong atalokdaktsüsangji Germany nung jenoka, par senso akümtsü meranger bendanger ka asütsü akok ta sorkari temulung malemba olen ka metetdakja, bendangertem par Germany linük nung jenokdaktsüba mapatong anentsü takhangba ka Germany yimsüsürtemi benoktsü tenzükogo.
“Tan lendong atalokdaktsüba keno nung ajemdaker temulung melemi bilema apusangji Germany nung senso küma alitsü meranger Pakistan nunger ka asütsü akok. Iba nisungbai aibelena inyak ta menangzüki lir saka pa ya joko mamshi yutsüba Tempelhof airport nung tentetba refugee jenokdak jenoka alir arishi küm 23 tain ka ta police-i metetdaktsüogo,” ta Germany Interior Minister, Thomas de Maiziere-i tanü, Mongolbar nü sangoktsü.
“Tan lendong den sentakba osang jenti tang tashi mejangteti lir saka tan lendongji kiralongratsü lendong ka ta züngshir,” ta Germany Chancellor, Angela Merkel-ia tanü metetdaktsü.
Ajisüaka, “Tan lendong atalokdaktsür truck gari anishir ta bilema apusangji asangsang nung lendong atalokdaktsüsangji asü masü iba kuli tang tashi monguteti lir. Anungji, ozü ketdangsertem ajunga kanga dang kümdangshia lir,” ta Berlin police lenisangi teratatsü osang ka sangokja liasü.
Tan lendong atalokba sülen Merkel-i tenzüka aliba bendangertem par linük nung jenoka lidaktsütsü mapatong agientsü takhangba benoktsü tenzükogo.
Merkel-i 2015 küm nungi tenzüka, iba mapatong tenzükba sülen Middle East aser Africa na densema, alima tesem balala nungi bendanger nisung million 1 dak temai Germany nung jenoka aliba osang bushiteta lir.