Bernardino Leon-i teloktep Libya sorkar tenettsü onük benoker

Tripoli, October 09 (Agencies): Libya-i ajurushia aliba mangatettep ken o bentettsütsü nükjidong nung teloktep Libya sorkar tentettsü onük ka United Nations (UN)’er Libya ambassador, Bernardino Leon-i tanü Hokolbar nü benokogo.

Islamist-tem densemba sorkar anemertemi Tripoli yimti tashiyim agi agiba sülen alimai agizükba Libya sorkari par linük anüdoklen jenoka sorkar tentettsüsa jenjang bener arutsü aser yamaji atalokba sülen yaküm August ita nungi tenzüka Libya nung parliament ana tashi tenteta aliba osang bushiteta lir.

Arab Springs ta ajaba nüburtemi longkak aitsü sentong tenzüka par lenisang, Moamer Kadhafi 2011 küm yimsüsütsü menden nungi tashiyim agi atsüngdokba sülen par linük indang yimsüsütsü tashi abentsü asoshi Libya sorkar anapronglai merangba ajanga par linük nung tang tensa kanga mejungi aliba osanga jangjaogo.

Aji oda, Tripoli nung tentetba parliament nung deputy, Fayez el-Sarraj-i anir külen par deputy prime minister ama, Libya anülulen, anüdoklen aser anülulentip nungi lenir ka ka shima teloktep sorkar tasenbaji tentettsü asoshi Leon-i tan benoker lir.

“Libya kübok densemba tesem balala nungi lenir 150 dak tema den küm ka shia agia sensaksema nungdakba onüktem benoka jembiba sülen Libya nung teloktep sorkar ka tenteta par mangatettep ken o bentettsü onük benokdangogo,” ta Leon-i tanü Morocco nung osangbener dang metetdaktsü.

Ano külen, Leon-i benokba onük kanga pela agizükba olen ka UN Secretary General, Ban Ki-moon-ia tanü metetdaktsüogo.

“Libya nunger asoshi tan benokba onük ya maongka tajung ka lir anungji, parnoki parnok tsüngda tongpang rarabaren anena teloktep sorkar tentetba ajanga par linük jenjang tajungba kümdaktsütsü Libya lenir ajunga ajungshir,” ta pai shisem.