Best actress award angutsü kanga meranga inyaktsüla: Sonakshi

January 5, 2016 : 2011 küm “Dabangg” film nung mezüngsüa Bollywood nung shilem agir rongnung tajungtila award agula, actress Sonakshi Sinha-i, la actress ajak rongnung tajungtila award angutsü meranga inyaktsü nüngdaker, ta ashi.
Film industry-i aiter küm pongu tsüngda nung lai nüngtugu actor Ajay Devgan, Akshay Kumar aser Salman Khan nunger den külemi shilem agidangogo aser nüngtugu film “Son of Sardar”, “Rowdy Rathore”, “Dabangg 2”, “Lootera”, aser “Holiday: A Soldier Is Never Off Duty” tem nung shilem agia lir.
Hombarnü 61buba Filmfare Awards atema osangbenertem senden ka akadang la-a dena liasü.
‘Best actress’ award kodang agutsü ta asüngdangdang, lai, “Iba akümket award agutsü atema kangsa meranga inyaktsü nüngdaker. Iba award atema 2014 küm ‘Lootera’ film atema kü tenünga benoka liasü saka award mangu….Ni mapa tajung aika inyaktsü nüngdaker. Aser kodang kü dak iba award langa lir ta parnoki meteta arudir, ni amangar parnoki kü nem award ji agütsütsü,” ta langzüa liasü.
61buba Filmfare Award January 15 nü akatsü sentong lir.