Beti Bachao, Beti Padhao dak sendakba nung District Task Force senden amen

Dimapur, Aenjeti/January 21 (TYO): Beti Bachao, Beti Padhao sentong dak sendakba nung District Task Force senden ka Aenjeti/January 21, 2019 nü DC Conference Hall, Mon nung menogo. Iba senden ya “save the girl child: educate the girl child” omen nung ajemdaker aka.
Iba senden ya Mon DC Thavaseelan.K, IAS lennisüba kübok aka. Pai ashiba agi, 2011 Census ajanga Mon District CSR tanabuba jenjang nung aliba sayuogo aser 2011 Census den medemdangra shilem 61 tashi tajemba kümogo, koba tebilemtsü ka lir.
KNSK tir Lomei Konyak, shiba iba senden nung dena liasü, pai ashiba agi, Konyak tsürtemi iba sentong takok ngua inyaka aotsü atema bendanga agüja yaritsü mulunga lir aser KNSK unit ajaki tetsür temeden dak sendakba nung seminar ayongzüka akatsü. Laisa, Konyak tsürtem ola angla mapa aser yongsen mapa nung tedangshi lir aser iba atema tetsürtem nem vocational training agütsütsü nungdaker aser asenoki item osettem ayoktsü asoshi lenmang bushitsütsüla, ta ashi.
Senden nung sentepa aliba lokti-i ita shia tetsürtem anogo amungtsü lemtet aser iba ya school tem nung akatsü aser BBBP Campaign dak sendakba nung tangazükba balala agütsütsü.
DC, Mon-i anir Beti Bachao, Beti Padhao tenangzüktepba agi. Senden nung Project Director, DRDA, Chief Judicial Magistrict, Chief Medical Officer, District Statistic Officer, District Education Officer, Child Development Project Officer, District Programme Officer, District Administration aser Konyak Union, KNSK & KSU nungi züngsemtem arua aden.