Bhaichung Bhutia-i party tasen ka tentettsü renema lir

Gangtok, Monupii (May) 21 (Agencies): Tawa kümtetba ‘Hamro Sikkim Party (HSP)’ iba ita tatemlen West Sikkim nung amenoktsüba atema renema lir, aser Sikkim Democratic Front (SDF) party aser par sorkari kecha minprong mesera iba sentong nung nisung 15,000 nungi 20,000 tashi adentsü imlar, ta party tentetsang Bhaichung Bhutia-i Amungnü ashi.
Pai ashiba agi, party amenoktsüba atema ternemshiba ajak kangajunga odar saka sentong agitsüba tesem dak sendakba aser ketdangsertem nungi temelaba balala agitsüba dak sendakba nung SDF sorkari-i tenokdangba agütsüba atema Bhaichung-i parnok aitsü.
“Hamro Sikkim Party amenoktsü atema inyakyim ajak kanga junga odar, saka state sorkari nüngdak makaba nung timtem aika agüja arudar. SDF sorkari onok party amenoktsüba atema timtem agütsüba ya onoki mangateter. Onok ya party tasen ka lir aser SDF puri onok metsübutsüla,” ta Bhaichung-i ashi.
Hamro Sikkim Party kümtetba ya Bhaichung aser party ngutetba züngsemtemi New Delhi nung Rongchii (April) 26 nü press conference ka nung sangtonga liasü.
“State sorkari tetsükdaktsü aika adokdakjaka nüburtem nungi tajungshiba tajung aika agüja arudar. Nüburtemi Sikkim nung temelenshi dang masü saka temelenshi tajung ka aginüba onoki reprangteter. Sorkari tenokdangba kecha magütsüra Hamro Sikkim Party amenokba sentong nung nisung 15,000 nungi 20,000 tsüngda arua adentsü imlar,” ta paisa ashi.
Party amenoktsüba anogo tejangjabo mesangdong saka Bhaichung-i Hamro Sikkim Party ya West Sikkim nung iba ita tatemlen amenoktsü renema lir, ta metetdaktsü.
Bhaichung-i ashiba agi, “party amenoktsüba atema onoki kanga meranga inyakogo. Taoba ita kaser tesadang ni Sikkim kübok kinük nung aliba tesem aika tetsüng aser gari nung semdanga senzüogo.”
Hamro Sikkim Party amenokba sentong nung politician mesera tongtibang nisugtem kar danga adentsü madentsü, ta asüngdangba mapang nung Bhaichung-i ashiba agi, party amenokba sülenang ajak metettsü. Mapangtong nung tongtibang nisungtem aser SDF züngsemtem party nung adentsü, ta paisa ashi.
Maneni party amenokba sentong nung Bhaichung-i Bollywood nungi par medemertem kar jaoktsü asoshi sentong lir.
State BJP tir D.B. Chauhan-i election matong tsüngda Hamro Sikkim Party den longjemtsüba indang jembiba nung Bhaichung-i ashiba agi, “tangatettsükaji Centre nung BJP-i aniba NDA sorkar den SDF pur longjemer lir. SDF pur ya ano northeast nung BJP puri tentetba NEDA (North East Democratic Front) nunga züngsem ka lir. Iba dak sendakba nung Sikkim nung aliba political party ka kodaser BJP den longjemtsü? BJP aser SDF na telungjem meraksa tashi Hamro Sikkim Party densema party kecha BJP den melungjemtettsü. State BJP tir-i iba ya jangjaa alitsü nüngdaker aser pai Sikkim nung tanga political party den longjemtsüba jembiba ya ni mangateter,” ta Bhaichung-i ashi.