Bhaichung Bhutia-i YouthNet’s hospitality program tenzüktsü

Kohima. January 28, 2019: Tanü Made In Nagaland Centre, Kohima nung YouthNet’s Hospitality Program tenzükba sentong nung football asayar nüngtugu, Bhaichung Bhutia-i YouthNet ketdangpurtem den külemi tangokba noksa nung angur.

Kohima, January 28 (TYO): Ministry of Skill Development & Entrepreneurship kübok PMKVY Scheme ajanga sponsor asüba YouthNet indangs Hospitality Program, 100% Job Guaranteed Training & Employment Program tanü January 28, 2019 nü Made In Nagaland Centre, Kohima nung India nunger football asayar nüngtugu aser YouthNet Advisor, Bhaichung Bhutia-i tenzüktsüogo, ta tanü ketdangsertem osang ka ajanga metetdaktsü.
Iba sentong nung jembidang Bhaijung Bhutia-i lanurtem dang, sademsadema zübazülema melii sorkar mapa dak alia tanga mapa maongka balala bushitsüji kanga tongtibang, ta metetdaktsü.
Iba dak sendakba nung pai, pa Northeast nungi lanur football asayar ka ama tamasabo timtem aser tayongzükba balala ajuruba lemsatepa liasü.
Paisa lanurtem dang, tejangraba alitsü, nükjidong tulu ayutsü aser item nükjidong arishitsü ayongzük.
Pa kinüngtsüi Hotel Management training agiba aser kanga nüngtugu five star hotel ka nung inyakba metetdakja pai, Hotels nung dang masü saka Sports Industry nunga Hospitality sector nung maongka aika lir, ta ashi.
Iba sentong ya Chair & Founder YouthNet, Hekani Jakhalu leniba nung agi aser Director YouthNet, Lezo Putsure-i okila jembia liasü.
Bhaichung Bhutia Football Schools India Co-Founder & CEO, Kishore Taid-ia pai Bhutia den külemi tenzükba Football Academy indang metetdakja liasü.
Iba sentong nung Hospitality Course Training agirtem, tejaokertem, lanurtem, aser Kohima nung aliba school aser college balala nungi kaketshirtem aden.