Bhandari district tentettsü takhangba agütsür

Dimapur, October 27 (TYO): Hokolbarnü Bhandari District Demand Committee (BDDC) aser Lower Lotha Oil and Mineral Bearing Zone Association (LLOMBZA) nati Wokha district kübok Bhandari Sub-division nungi Bhandari district ajungkettsü aser NPNG Rules and Regulations 2012 yanglushitsü atema state sorkar dang mepishiogo.
Tanü BDDC aser LLOMBZA nungi teshimtet telok kati Chief Minister TR Zeliang den ajurutep aser parnoki Bhandari district headquarters tentettsü atema tezüluba nung takhangba ka agütsü.
Gari lenmang aser ketdangsüba tsütsü tetsükdaktsü den tangar memenepi aliba tesemtem aliba ajanga Bhandari district headquarters tentettsüla, ta parnoki ashi.
Chief Minister-i iba onük süoki ia agizük aser district tasen ka tentettsü takhangba asadangtsü atema verification team ka yoktsü ta teshimtet telok dang nangzük.
Assam den arrtsü tebilemtsü, road & communication majungba aser rongsenkettsüng tsütsü jenjang mejungi aliba ajanga Bhandari nung ali rongsen bendena aliba tamshi shia amshitsüla, ta TR Zeliang-isa ashi.
Iba onükji BDDC aser LLOMBZA teloktemi nübortem dang angatetdaktsütsü aser Nagaland nung alirtem ajak ajangzüktsü atema mapa inyaktsü atema tenangzükba agitsü ajungemesoang, ta
Nagaland sorkar aser Centre tsüngda state nung petroleum & natural gas onük atema kanga dang junga olemtepdar. Ajisüaka, asenoki okadak PIL benokba ajanga iba maparen anena lir. Anungji, iba onük angatetteptsü atema BDDC aser LLOMBZA teloki inyaktsü mepishir, ta Chief Minister
Bhandari district tentettsü ta asüba tesem indang tasazükji 778.74 Sq.kms lir. Iba tesem ya Wokha district headquarters nungi kilometer 70 shi pilar lir aser iba tesem kübok yimtsüng 73 lir.
Nagaland nung sub-division tejentiba ya külenbo Assam den arrtsüa lir aser Lotha nunger teimba sür liaka, Sumi aser Karbi nungertema aika lir. Bhandari nung ali rongsen jenti lir saka gari lenmang tajung maliba ajanga nübortem Assam len nungiang senzüsenbonger.
1983 küm nung tanü tashi iba tesem ya sorkaribo ‘Economically and Developmentally Backward Area’ ta züngshir.