Kathmandu, August 01 (Agencies): Nepal nung tentetba yimtenren teloktemi Nepal sorkar tasenba tentettsü tetuyuba ka Nepal Tir, Bidya Devi Bhandari-i tanü, Hombar nü agütsüogo.
Nepal nung tentetba yimtenren teloktemi yashi, Deobar nü senden mena aroki lungjemer teloktep sorkar tentettsü merang saka parnok rong nung tangatettep kati maruteti par alizüng asangsang nung matalokdaktsütetti senden tembanga liasü.
Yimtenren teloktemi aroki lungjemer sorkar tentettsü asoshi latettsüba anogo 7 yashi tembangba yong Ato Kilonser tasen shima, Nepal sorkar tasenba tentettsü tetuyubaji Tir office-i Nepal Parliament dang shiti ka ajanga agüja liasü.
“Nepal linük temzüng kübok Arrla 299(3) aser Arrla 305 nung ajemdaker Ato Kilonser tasen shima Nepal sorkar tasenba tentetsü tetuyuba ka President Office-i shiti ka ajanga Nepal Parliament nem agütsüogo,” ta Parliament Speaker’er press advisor, Babin Sharma-ia osang jangjashitsü.
Paisa ashiba agi, par Ato Kilonser tasenba shimtsü election tan Bodbar nü agitsü asoshi Parliament yimsüsürtemi sentong renema lir.
Parliament Secretary General-i aniba luden kati election-ji ketdangsüa agitsü aser parliament yimya amshia, Ato Kilonser menden atema candidate ama tokteptsü jangrar yimsüsürtemi tan Mogolbar nü par tenüng züluoktsü.
Tan agitsü renemba Ato Kilonser election nung Parliament nung züngsem timba densemba yimtenren telok, Nepali Congress-i nungitsang, CPN (Moaist Centre) yimtenren telok mendenbuba, Pushpa Kamal Dahal Prachanda-i vote timba ngua, Ato Kilonser tasenba akümtsüsa tang jenjang tajung ngua lir.
You must be logged in to post a comment Login