Bhandari nung 4buba Inter-departmental sports meet tenzükogo

Bhandari, Metsüremi/March 08, 2022 (TYO): Beti Bachao Beti Padhao mapatong pusema Local Ground, Bhandari nung Mongolbarnü  4buba Bhandari Inter-departmental sports meet 2022 tenzükogo. Iba Meet lapokba sentong nung alakteta tejaoker ama Additional Deputy Commissioner Bhandari, Rohit Singh IAS dena liasü, ta sangdong ka ajanga metetdaktsü.

Tetsür anema mapa tamajung inyakba aser parnok bendanga amshiba dak sendakba nung tekümdangtsü osang sangoktsütsü nükjidong nung Beti Bachao Beti Padhao akhüm nung iba Sports Meet ayongzüktsü asoshi iba sub-division indang sorkar tenzükba wadang nung inyakertemi maneni meranga inyakba ngua ADC-i pelaba lemsatep; aser lenla ajunga nung tetsürtem maparen nungitta yaritsü mepishia liasü.

Iba ama saisapong sabang agütsüba ajanga pei sempet tali jangjatettsü asoshi maongka agütsür aser nükjidong ka ataloktsü asoshi telongjem lidaktsür, ta pai ashi.

Iba sentong nung  Lily Ngullie, APRO Bhandari menden liasü aser SDAO Office Baghty, Senkathung Kikon-i ken ka tena telok saksalemdaktsü.

4buba Inter-departmental sports meet tenzüka football match asaya liasü, kong PWD (R&B) (EE Baghty), Housing, and PHED team-i goal 2-0 agi Education department tsükdaktsü. Tanabuba match nung District Administration & Police-i goal 7-0 agi Medical, GHSS, and Soil & Water Conservation department team tsükdakja liasü.