‘Bharat bandh’ mapang states/UTs nung security akangshitsü tuyu

New Delhi, Rongchii/April 09 (Agencies): Rongchii (April) 10, 2018 nü lokti tentet kari Bharat Bandh ayongzüka aliba nung ajemdaker Union home ministry-i states aser Union Territories dang security akangshitsü aser lendong mataloktsü atema nüngdakba mera ajak agia inyakang, ta tetuyuba agutsüogo.
Osang anazükba agi, SC/ST Act dak sendakba nung Rongchii 2, 2018 nü longkak aitba sentong ka agiba anema Sangtennü (Mongolbar) longkak aittsü atema social media ajanga osang prokshiogo.
Rongchii (April) 2, 2018 nü longkak aitba mapang nung tesem aika nung nisung asü aser aika yirua liasü.
Tanü home ministry-i state tem dang tenokdangba balala tetuyuba agüjang, aser nüngdakra nisung asüba aser kiojen raksaba nokdangtsü atema lendong ataloktsüsa aliba tesemtem nung sepai peria lemzükja patrolling senzüdakjang, ta metetdaktsü.
Home Ministry-isa district magistrates aser superintendents of police tem dang peipei tesem nung tzüzüng-ozüng benoka tensa azüoktsü atema metetdaktsüba den külemi pei aliba tesem nung lendong atalokra nenok khuret asütsü, ta metetdaktsüogo.