‘Bharat Mata Ki Jai’ ashitsü ya sorkari latetja mali:Naidu

New Delhi, April 05 (Agencies) : Union Parliamentary Affairs & Urban Development Minister M. Venkaiah Naidu-i, nisung balalai “Bharat Mata Ki Jai” ashitsü atema tebilemba balala ashir ajisüaka ibai ashitsü ya sorkar ozüng nung kecha latetja mali aser nia item tebilembatem magizükteter, ta Mongulbarnü ashi.
Maharashtra Chief Minister Devendra Fadnavis, yoga guru Ramdev aser Rashtriya Swayamsewak Sangh lenir Bhaiyaji Joshi nungeri “Bharat Mata Ki Jai” ashitsü idang ashibaji nibo magizüker, ta Naidu-i ashi.
“Iba ya ashitsü atema sorkari lalettsüba ozüng kar tezüluba nung lemja lir asü ?” ta pai asüngdang.
Joshi-i, “India ya ketsü taso lima ta agizüker ajaki “Bharat Mata Ki Jai” ta ashitsüla,” ta ashi.
Fadnavis-i, “Nisung shibai “Bharat Mata Ki Jai” ta meshilir pa/la India toktsür aotsüla,” ta ashi.
Ramdev-i, “Linük ozüng akhüm metsübu asübo “Bharat Mata Ki Jai” mashirtem ajak ni tekolak tangzüker lila,” ta ashi.
Iba yimyim ya linük nübur ajaki tebilemba tajung nung amshitsü nüngdak, ta Naidu-i ashi.
Aji oda süaka iba yimyim amshitsübasa ta sorkar ozüng kecha mali aser sorkari iba yimyim ajaki ashitsüla ta latetja mali, ta Naidu-i jangjashitsüogo.
“Democracy linük ka nungji nüburtemi aika jembitsü ajisüaka tatem nungbo sorkari lemtetbasa agia atemtsü,” ta Naidu-i Indian Women Press Corps nung osangbenertem senden ka amenba mapang ashi.
“Parnoki bilema ashibaji sorkari melaba masü,” ta pai shisem.
Fadnavi-i jembiba oji koma bilemer ta lepshia asüngdangdang union minister-i, “Pai ashiba ama inyaktsüji Chief Minister-i ozüng kar yanglua ali asü ?” ta pai ang meyiper asüngdang.
“Bharat Mata Ki Jai” yimyim dak sentakba nung nisung balalai o kanga agütsütepa arudagi.
Iba yimyim atema tebilembatem ashiba nung opposition-i Bharatiya Janata Party (BJP) aser parnok nungiter Rashtriya Swayamsevak Sangh (RSS) telok na aitsür.
Iba dak sentakba nung tawa Islamic telok nungi Darul Uloom Deoband-i, onok tamangba yimsü agi “Bharat Mata ki Jai” ashitsü memelar, ta telangzüba ka agütsüogo.