‘Bharat Mata Ki Jai’ mashiba atema MLA, Pathan anentsü

Mumbai, March 16 (Agencies): All India Majlis-e-Ittehad-ul Muslimeen (AIMIM) MLA, Waris Pathan-i ‘Bharat Mata Ki Jai’ ta ashitsü memulungba atema Bodhbarnü Maharashtra Assembly nungi anentsüogo; Pa budget senden piyong anentsü.
Tanü assembly nung BJP MLA, Ram Kadam-i Pathan dang ‘Bharat Mata ki Jai’ ta shiang ta ashi, ajisüaka Pathan-i memulungba sülen senden nung rongrong adoka tanga party temia pusema pa tangsa anentsütsüla, ta takhangba agütsü.
Tan budget senden piyong Pathan anentsütsü atema Minister of State (Parliamentary Affairs), Ranit Patil-i benokba ama House-i ibaji agizük.
Parliament nung Javed Akhtar-i jembiba onük dak sentakba nung Pathan-i, “Javed-i ‘Bharat Mata ki Jai’-i shinüra shidakjang, onokibo mashitsü. Onoki Hindustan Zindabad aser Jai Hind ta dang ashitsü,” ta langzü.
Paisa, “Ni India nunger ka asübayong nüma atanger,” ta ashi.
“Senden piyong anentsüba ya democracy tepsetba lir. Ni Bharat Mata Ki Jai ta masü (saka) ‘Hindustan Zindabad’ ta ashir,” ta paisa shisem.
Tesülen osangbenertem den jembidang Pathan-i, “Ni kü linük meimer, ni yangi aso aser yangisa asütsü. Ni kü linük mezüngmeshi masütsü. Yimyim ka ajanga nisung kati linük meimba masadangtsüla. Jai Hind, Jai Bharat, Jai Maharashtra,” ta ashi.
Deobarnü AIMIM tongti, Asaduddin Owaisi-i, “Ni iba yimyimji mayimer. Iba atemaji nai kü dang kechi inyaktsü, Bhagwat sahib (RSS tongti). “Nai (Mohan) kü terok nung nok metalokaka ni ibaji mashitsü,” ta jembiba ajanga mangatettep adokba sülen iba dak sentakba nungsa tanü par MLA Pathan anentsür.
2014 küm Owaisi’er party-i par state, Telangana adener mezüng Maharashtra nung toktepa menden ana nung takok angu. Pai mapang shia rara adoktsüsa tesempa o aiben jembia aruogo.