‘Bharat Mata Ki Jai’ mashirtem linük nung malitsüla: Fadnavis

New Delhi, April 03 (Agencies): Linük meimba onük nung o toktepba mapang ka nung Maharashtra Chief Minister, Devendra Fadnavis-i, ‘Bharat Mata Ki Jai’ ashitsü memelungertemji linük nung alitsü temeten mali, ta ashi.
Yasüng lokti senden ka nung jembidang Fadnavis-i, “‘Bharat Mata Ki Jai’ ta ashiba nung maneni o toktepdar, aser ibaji anemertem yangi alitsü temeten mali. Yangi (India) alirtemi ‘Bharat Mata Ki Jai’ ta ashitsüla,” ta ashi.
Congress tatong Tir, Rahul Gandhi-i linük anemba yimyim ayimertem pusemer ta paisa aitsü.
Pai, opposition party temi BJP anema yimyim ayimtsüla, saka ‘Bharat Mata’ yimyim anema meinyaktsüla, ta ashi.
Tekülem ki kar nung tetsürtem nokdangba onük nung o toktepba dak sentakba nung Fadnavis-i, “Hindu sobaliba nung tetsür-tebur tebendang mesüra kin tebendang mali, anungji tekülem ki kar nung tetsürtem aitsü memelabaji tim masü,” ta ashi.
Pai ashiba agi, iba ken o nung state sorkari Bombay High Court nem sangdong ka agütsüogo, anungji tarutsü nungbo tetsürtem tekülem kidangi aiba menokdangtsü.
Party mesüra lenir tenüng shinga metetshii CM Fadnavis-i, Vidarbha, Marathwada aser tanüngba Maharashtra na tsüngda nisung kari mangatettep adokdakstür, ta ashi.
Nashik dam nungi Marathwada nungeri tzü meshia lungkak aitba dak sentakba nung Fadnavis-i, “State nung iba tesem nung alirtem tzürar, anungji parnok nem tzü agütsütsüji asen teinyaktsü mapa,” ta ashi.
Iba senden nung Fadnavis-i CCTV network kübok Nashik city, service 150 online kümtsütsü indanga jembi.
Kasa senden nung BJP state unit tongti, Raosaheb Danve, Revenue Minister Eknath Khadse aser district Guardian Minister, Girish Mahajan nungeria jembia liasü.