‘Bharat Mata Ki Jai’ mashirtemji Pakistan nunger lir: BJP MLA Surendra

New Delhi, Tsüklai 26 (Agencies): Baira nungi Bharatiya Janata Party (BJP) MLA, Surendra Singh-i, ‘Bharat Mata ki jai’ ta meshitetertemji Pakistan nunger lir, ta jembi.
Singh-i tamalena mangatettep adoktsüsa o aiben jembia lir. Taküm Aenjeti ita nunga pai, 2024 küm tashi nung bo India ya Hindu linük ka akumtsü, ta jembiogo, aser item ama o jembiba ajanga MLA atema tenangzükba agidang India temzüng kübok inyaktsü nangzükba alema inyaker.
Yashi Singh-i, “Linük meimer Muslim nunger kar dang lir. Kodang India ya Hindu linük ka kümdir, asenok sobaliba benshir Muslim nungertemji India nung alitsü,” ta ashi.
Singh-i, Ato kilonser, Narendra Modi ya ‘avatari purush’ (tsüngrem ka tanaben asoba) lir, ta jembia liasü.
Paisa, “Tsüngrem taochi ajanga India ya alima nung tashi tulu aliba linük ka akumtsü, aser iba atemaji Ato kilonser Modi aser Uttar Pradesh Chief Minister Yogi Adityanath na dang pelar. India ya ‘vishwa guru’ ka dang masü saka 2024 küm tashi nungbo Hindu linük ka akumtsü,” ta metetdaktsü.
Singh-isa Congress aser party Tir, Rahul Gandhi aija, “Rahul Gandhi indang tangatetbaji ana lir- ka Italy indang aser kaji India nunger indang lir. India nunger tangatetba nung pai kodanga len manitettsü,” ta ashi.
Rahul-i pa Ato kilonser akumtsü atema yimyim aika sangdongtsüa akok, saka pa dak tashi mali, ta paisa ashi.