Bharti Airtel-i prepaid amshir dang second sasep nung sen agitsü

New Delhi, September 21 (Agencies): Airtel amshirtemi pei network amshiba mapang tataktet shitak asoshi dang sen agütsü atema Bharti Airtel-i linük nung pre-paid amshirtem asoshi ‘per-second bill plan’ ka tenzüktsüogo.
“Tan “Nai amshiba atema dang sen agüjang” (Pay For What You Use) inyakyim nung ajemdaker ‘Customer tama’ ta asüba yimyim den putepa iba sentong tasen tenzükba ajanga Airtel-i tamshirtem dang nungi pei amshiba sasep nung dang sen agitsü,” ta Hombar nü company sangdong ka ajanga metetdaktsüogo.
Tang Telecom Regulatory Authority of India (Trai)-i phone tejembitak nung line aoba ajanga company tem kecha tajangzük angur asü mangurar tendangba mapang ka nung Airtel-i iba sentong ya lapoker. O tejembitak nung line aoba ya tang ita asem-pezü ka tsüngda kanga ataloker. Taoba hopta Ato Kilonser Narendra Modi-ia iba dak sendakba nung tebilemba kar lemsatepa company tem dang iba timtem ya tekaratiba nung bentettsü shia liasü.
Telecom Secretary Rakesh Garg-i, service amshirtem nem angati minute kar agütsütsü asoshi aser minute sasep nung sen agiba ya melenshitsü asoshi kanga junga asadangtsüla, ta shia liasü.
Bharti Airtel (India & South Asia) nung MD aser CEO Gopal Vittal-i, phone plan noklang nung shilem 95 bo ‘direct’ lir anungji o tejembitak nung line aoba ajanga company asoshi tajangzük kecha magütsür, ta tawa metetdaktsüogo.
Airtel pre-paid amshir aika second sasep indang plan amshidar saka ano metongsemi alirtem ajak iba plan yagi melentsütsü nükjidong lir, ta sangdong nung shia lir.
“Customer aliba ajanga dang business-a alir, anungji onoki mapang shia parnok ajungtsü asoshi maparen aser sentong balala lapoktsür,” ta Bharti Airtel (India & South Asia) nung Market Operations director Ajai Puri-i ashi.
Kodang pre-paid ajak second sasep nung sen agiba sentong kümdir tamshirtemi ano ‘discount packs’ balala amshitettsüsa maongka angutsü, ta Bharti Airtel-i ashi.
Airtel amshir rongnung pre-paid amshir noklang nung shilem 94.4 lir ta taküm June tashi nung asadangteta lir.