Bhatkal nung IM sülen tang ano IS shimmer

New Delhi, February 2 (Agencies): Intelligence department temi Indian Mujahideen (IM) kiralongrar telok poktetba tesem ta jangja aliba, raliwali jajartemi sapuba tesem Bhatkal, Karnataka nung nisung ishika apuba sülen tia makai Islamic State (IS) shimba tesem ka akümer ta security tenük ajanga repranger.

Intelligence agency temi Shafi Armar ya India nunger IS yimsü dangi anisang tongti nisung lir—karbo Syria nung oa IS telok nung dener parnok atema raradar— Pa ya Bhatkal jila nung soa intet aser 2006 küm India toktsür mao tashi par adianu ana den külemi liasü.

Osang tejangja meteta alirtem kari IANS osangbenertem dang ashiba agi, Armar ya IM nung tongti nisung Riyaz aser Iqbal Bhatkal na den Pakistan-i jena mao tsüngda mezüng IM telok nung züngsem ka ama liasü. Pa jena aoba mapang tedi tambusang asür, Sultan-a anidaka ao.

Iba sülen Armar ya training agitsü asoshi Syria-i ao aser tang pa Ansar-ul-Tawhid telok nung tongti nisung ka lir, ta parnokisa ashi.

Ansar-ul-Tawhid telok ya Islamic State den lokteptsü tenangzükba agir aliba telok ka lir.

Pai iba sülen IS India telok ka tentet aser iba telok dang Janood-ul-Khalifa-e-Hind ta ajar. National Investigation Agency (NIA)-i tesüiba hopta iba telok nung züngsem 14 tashi linük tesem balala nungi pua arua lir. Iba telok ya April 2015 nungi tenzük, ta kasa osang ajangasa ashi.

Armar sülen ano IS asemer Suhail Ahmed, Damudi, Mohammed Afzal, Najmul Huda aser Muhammad Abdul Ahad nungera NIA-i pua lir aser parnok ajak ya Bhatkal nung sendaktepa lir.

“Tang pua aliba nisung ajak ya Bhatkal nung tesendaktep alir tesa lir. Parnok iba telok nung kechi shilem agirar metettsü atema tang asüngdangya südar. Asüngdangya asürtemi iba jila nungi par telok nung züngsem kwi lir ibajia metettsü merangdar,” ta kasa nisungtemi IANS dang ashi.

Pua alirtem dang IS teloki Bhatkal nung IS atema nisung shimba mapa dang masü saka India tesem ajak nungi IS asemer bushitsü ashi aser ibaji atema Lucknow, Mumbai, Mangalore, Tumkur (Karnataka), Haridwar aser Hyderabad yimtitem nung senden aika menogo, ta asüngdangyartemi ashi.

Ketdangser kati ashiba agi, iba nisung yagi Bhatkal aser Karnataka anasa aliba jilatem nung alir mezüng IM telok nung dena alirtem IS dangi atsür aotsü meranger.