Bhilai Steel Plant nung lendong atalok; nisung 9 asü

New Delhi, Mongputeni/October 9 (Agencies): Chhattisgarh kübok Durg district nung state meyong, Steel Authority of India Limited’s Bhilai plant nung pipe line ka apokba sülen iba plant nung inyaker teku asü aser parnok 14 yiruogo, ta police sangdong ka ajanga metetdaktsü.
Pipe line ya Bhilai jila nung plant indang coke oven section anasa apok, koba state yimtiba Raipur nungi km 30 shi pilaar lir, ta kasa sangdong ajanga metetdaktsü.
Sangdong ka ajanga SAIL-i ashiba agi, “iba lendong ya tanep 10:30 ako shi nung SAIL Bhilai Steel Plant nung atalok. Maintenance asüba mpang Coke Oven Battery Complex No 11, gas pipe line nung mi adoka liasü. Idakji aliba nisung kar mi agi ronga liasü.”
“Yirur alirtem idakjisa temang anepalutsü atema BSP mozüki bushia anir ao. Kasa mapang nung mi adokba ya tangbo azüoker lir. Tang tashi nung nisung 9 süogo aser nisung 14 temang anepaludar. Yirur alirtem nem takokba tashi teyari agütsütsü asoshi inyaktepdar.”
Lendong atalokba sülen police aser tekümzükertem iba tesemi aritepa ao, ta ketdangsertemi ashiba den yirur alirtem mozüki bushia anirogo ta ashi.
Nisung pezü agi kümtetba inquiry committee kati iba lendong atalokba ya operating staff zübazülemba ajanga lir ta aitsüogo. “Unit shibanga ayuba ajanga iba lendong ya paitokteter lila, saka operating staff-i mechanical science nung tinyaktsü tezübatiba zütokba ajanga iba ya atalok,” ta ashi.
2014 küm Bhilai Steel Plant nung pipe line apokba sülen idakji inyaker parnok 6 asü.
Maneni 2017 küma Yimpoksüi/Nov nung Uttar Pradesh kübok Unchahar tesem nung aliba National Thermal Power Corporation (NTPC) Limited nung lendong atalokba sülen nisung 43 tashi süogo.

You must be logged in to post a comment Login