Bhima Koregaon ken o nung apurtem house arrest nung ayutsü tuyu

New Delhi, Luroi (August) 29 (Agencies): Bhima-Koregaon ken o dak sendakba nung Maharashtra Police-i rights activist 5 pua alibaji September 6 tashi house arrest nung ayutsü atema Supreme Court-i tanü tetuyuba agütsü.
CJI Dipak Misra aser Justice AM Khanwilkar o Justice DY Chandrachud nunger bench-i tanü iba tetuyuba agütsü.
Historian Romila Thapar den human right activist tem- Prabhat Patnaik, Satish Deshpande aser Maya Darnall nungertemi SC nung temepishiba ka benokba sülen bench-i iba tetuyuba agütsü.
Activist temisa SC dang nisung shia balala bushisüngdangtsü atema mepishi. Parnokisa SC dang Maharashtra sorkari parnok apuba atema telangzüba meshiang ta ayongzük.
Activist tem atema lawyer Abhishek Manu Singhvi-i ashiba agi “FIR nung apurtem tenüng shia mali aser parnok senden nung shilem agiba indang tai tongloktsüba kecha shia mali.”
“Nisung kati sorkari ashiba magizükba atema dang apuba lir” ta paisa ashi.
Maharashtra Police-i Mongulbarnü state balala nung Left-wing activist tem ki mita ao aser Maoist den tesentaktep lir ta temulung melemi bilemer par pungu apu.
Yaküm December 31 nü Pune anasa Koregaon-Bhima yimtsüng nung Dalit aser upper caste Peshwa nunger tsüngda rara adokba ken o bushisüngdanga aruba dak sendakba nung activist punguji apu.
Taoba ita ana tsüngda Maoist-i Prime Minister Narendra Modi, BJP president Amit Shah aser Home Minister Rajnath Singh nunger tepsettsü tasa atongba shidi ana anguba den-a iba ken o sendaktepa lir, ta security ketdangsertemi ashi.
Police-i Hyderabad nung Telugu poet Varavara Rao, Mumbai nung activists Vernon Gonzalves aser Arun Farreira, Faridabad nung trade union activist Sudha Bhardwaj aser civil liberties activist Gautam Navalakha nunger ki mita ao.
Iba mapang police-i IPC Section 153 (A) kübok Rao, Bhardwaj, Farreira, Gonzalves aser Navalakha nunger apu.