Bhopal: Rong lendong nung nisung 12 asü

Bhopal, September 13 (Agencies): Hokolbar anepdang 4:30 ako meta Bhopal nung aliba Khatlapura Ghat nung Ganapati süngyanglu tzü nung inoktsüba mapang alentepa aliba rong ana meküpba lendong nung nisung 12 asü.
Rong ana nungji nisung 23 mener liasü, parnok rongnung nisung tenet tzü wadanga tzükümi aruteta kümzük aser nisung asem samar mangur, ta Irshad Wali, Bhopal (City) Deputy Inspector General (DIG) of Police-i metetdaktsü.
Tenük kuli alirtemi ashiba agi, rong anaji alenteper liasü; süngyanglu ka awatsüng nung inoktsüba mapang nung rong ka tera meküpba ajanga rong nung alirtemji kar aoksar tanga rongba nungji ponglokba ajanga iba lendong atalok.
Rong anir anajagi tangar kümzüktsü memerangi tzü wadanga tzükümi aru, ta parnokisa ashi.
SDRF teams, tzü telungi air mongintem aser police senteper tasümang bushidar, ta osang angazüker.
Madhya Pradesh Chief Minister Kamal Nath-i iba lendong atalokba kuli bushisüngdangtsü atema Bhopal district collector Tarun Pithode nem tetuyuba agütsüogo, aser ketdangsertemisa rong anir ana Akash Batham aser Changu Batham na anema FIR ka benokogo.