Bhutan nung menoknok tesashi ka agi kongshitsü akok

Washington, October 27 (Agencies) : Himalayas tesemlen aliba Bhutan linük ya India aser China na agi meketbanga lir aser iba linük nung 1714 küm atalokba ama menoknok tesashi ka adoktsü akok, ta scientist temi metetdaktsüogo.
Himalaya tesemlen aliba linük rongnung küm 500 shi menoknok tesashi manokdangi aruba linükji Bhutan ya ka lir.
Otsü tejentem aser geological data reprangdangdang 1714 küm 7.5 nungi 8.5 magnitude nung anokba menoknok tesashiji Bhutan anüolen tsütsü anok asütsü ta bushiteter. Iba mapang iba tesemji netsüng yongsük timba aliba tesem ka liasü.
“Bhutan ya Himalaya len aliba linük rongnung menoknok agi kongshitsü tesem ka lir ta tan mezüngsüa shiteter,” ta University of Lausanne, Switzerland nungi geophysicist aser iba bushisüngdang asür rongnung lenisang Gyorgy Hetenyi-i ashi.
Himalaya tenemtsünglen kilometre 2,400 telungtet nung menoknok tesashi anoktsü akok, ta parnokisa ashi.
Iba tenemlen aliba linük Nepal nung April 2015 nunga menoknok tesashi anoka takoksa tulu bener arutsüogo.
Ajisüaka scientist temi tenemtsünglen kilometre 2,400 kübok aliba tesemtem ajak nung menoknok anoktsü manoktsüar ano kanga jangja monguteti lir.
Item tesem rongnung Bhutan nung ang mapang talangka menoknok manok dangi arur.
Anungji tang bushisüngdanga ngutetba dak ajemdaker iba tesem nung aliba nisung million ishika dangji alima nung arutsü aliba lendong jelia metetdakja atar, ta Hetenyi-i ashi.