Bhutan nunger Tourism ji Nagaland den tapet asütsü: Wijaya

Jotsoma (Kohima), April 07 (TYO): April 07, 2016 nü Regional Centre of Excellence for Music & Performing Arts (RCEMPA), Jotsoma nung Bali, Indonesia nungi landscape designer nüngtugu, Made Wijaya shiba nem ‘Galliano of Gardens’ naroküm agüja lir pai “The relevance of boutique/village hotels design for Nagaland” onük nung jembia liasü.
Iba onük nung jembidang pai, “Tourism dak sentakba nung Bali aser Nagaland na temesüktep aika lir,” ta ashi.
Pai Naga nunger yimtsüngtem ngua pelaba lemsatepba den külemi Khonoma yim nung lung agi yangluba teka mapatem ajanga pa kanga melungsüa liasü.
Pai ashiba agi, Bhutan nunger tourism model ji Nagaland den kanga tapet asütsü. Tourism ajanga nisung puaba aser hospitality ji tongtibang ta shia pai, Bali-i lenmang sayuogo aser Nagaland-a tesülen atsüngzüka mali, ta metetdaktsü.
Tesüiba küm 40 tashi Wijaya ya Hospitality industry design consultant inyaker, iba mapang nung pai linük 25 nung garden 1000 design süogo, iba den külemi alima tesem balala nung boutique hotels aika design süogo.
Hyderabad nung Nizam indang palace gardens aser Florida nung Naples Botanic Garden densema pai alima tesem balala nung gardens design asür, iba den külemi cultural tourism aser hospitality industry design nung sobaliba indang onüktem nung jembir.
Iba sentong ya Parliamentary Secy. for Tourism, C. Apok Jamir lenisüba nung agi, aser pai okila Nagaland Tourism indang jembi.
Kasa sentong nung Additional Director, Tourism, K.T. Thomas-i lokti pelaa agizük aser Nagaland Tourism Association (NTA) Tir, Vincent Belho-i anküp tepela o jembia liasü.