Bhutia AIFF advisor nungi December ita anendaktsüogo

Kolkata, March 05 (Agencies) : All India Football Federation (AIFF) obang mapu adoka tesüiba mapang India captain, Bhaichung Bhutia AIFF aser Tir Praful Patel na prong indang advisor mapa nungi anendaktsüogo.
Shitakba reprangdangra India nungi football asayar tajungtiba rongnung ka, Bhaichung Bhutia ya advisor mapa nungi yaküm December ita nung anendaktsü, ta Deobarnü iba osang jangja meteter kati osangbenertem dang ashi.
Bhutia ya advisor mapa asoshi küm ana tejakdang aniok aser iba sülen India atema pai coach Stephen Constantine tanaben anioka pa indang contract Februry 2018 tashi yangluba nung tongti shilem agia liasü.
“Aji oda süaka pa Praful Patel indang technical advisor mapa nungi December ita nung anendaktsü. Pa contract tanaben meyanglushi,” ta kasa osang ajanga ashi.
“Tang Bhutia-i AIFF Technical Committee nung mendenbuba mapa-a bena lir aser pa iba mapa nungia anentsütsü asü manentsütsüar ibaji tan ita tatemlen executive committee senden akadang lemtettsü.
Angashiba agi, India U-17 World Cup team coach Nicolai Adam mapa nungi anendaktsüba sülen pa melena coach asütsü asoshi Bhutia-i Colm Toal nübu aginüa liasü. Ajisüaka AIFF-i pa melena Portugal nunger Luis Norton de Matos ang agitsü lemtet.