Bhuvneshwar Kumar dangi taküm samatsütsü amokmerenba osang aru

Meerut, August 9 (Agencies): Cricket asayar, Bhuvneshwar Kumar aser tebu na dangi ali nung ken o mangatettep kar ajanga taküm samatsütsü amokmerenba osang ka aru, ta Deobar nü police-i ashi.
Iba ya tim masüba mapa lir ta aija Kumar tebu Kiranpal Singh-i district nung aliba Inchauli police station nung ken o ka benokogo.
Iba tezüluba nung Kiranpali ashiba agi, tang nisung tepsetba ken o nung tepuokdak yua alisang, Bulandshahr district nung alir, Ranveer Singh dang sen lakh 80 agi ali ka alitsü jembia liasü.
Sen ajak internet banking ajanga agütsütepogo aser iba maparen April ita nung tembangtsü liasü. Saka tang tashi Ranveer-i iba aliji par tenüng nung memelentsü, ta police-i ashi.
Ranveer Singh-i sen jia memeyiptsütsü ta ashi aser Bhuvneshwar Kumar o tebu na taküm agitsü amokmeren, ta police-isa ashi.
Police-i, iba tatalokba nung Ranveer Singh aser pa den yariteper parnok nisung pongu anema FIR ka benokogo, ta ashiba mapang, bushisüngdang maparena tenzükogo, ta ashi.
Bhuvneshwar Kumar’er kibong ya Meerut nung telidak aser Kumar bo tang India team tenüng nung asayatsü asoshi Sri Lanka nung oa lir.