Bible Study ayongba atema tetsür ka küm 3 tepoukdak ayutsü

Beijing, January 03 (Agencies): China linük nung Khrista dak amangertem anema inyakba mapang ka nung tetsür kati Bible Study ayongzüka agiba atema küm asem tepuokdak ayutsü obendang agütsüogo.
Khristantem reshikangshiba mita reprangba telok- China Aid-i ashiba agi, yaküm November ita nung police-i tetsürla, Ma Huichao densema Khristan pongu apu.
Ketdangsertemi ashiba agi, parnoki sorkar dang nungi temelaba magii Bible study ji ayongzüka agi.
“Lokti makmakshi-makdaktsütsü atema lai nisung ayongden ta tai tongloktsü, iba den külemi lai aibelena mali, ta la pusema jembitsü atema la asoshi okatsür, Li Dunyong nem o jembitsü temelaba magütsü.
China anüdoklen Xinjiang nung aliba court kati Ma Huichao December 30 nü nungi tenzüka küm asem tepoukdak ayutsü atema obendang agutsü.
China linüki officially bo tamangba yimsü mashie amangtsü atema temeten agutsür, ajisüaka ruling, Communist Party ketdangsertemi tamangba lokti balala dak melung melemteti parnok anema inyaker.
Yaküm Tir, Xi Jinping-i tamangba yimsü balala dang China sobaliba den tapet süa alitsü atema ayongzüka liasü.
Iba mapang nungjagi tenzüka sorkari memelaba house churches aika anentsüogo, iba den külemi ‘lokti makmakshimakdaktsüba’ taitsüba kübok pastor densema amangbapur aika puogo.
Khristan yimsü ainba nokdangtsü atema ketdangsertemi Tenla kitem nungi Kangki 1,800 shi intoktsüogo aser iba nungji aiaura makai anema jembir Arogo züngsem aika puogo.