Bidhya Bhandari Nepal indang mezüngbuba tetsür Tir akümer

Nepal Tir tasenba akümtsü jenjang tanü Bodbar nü angula, Communist Party of Nepal (Unified Marxist-Leninist) lenir, Bidhya Bhandari-i Kathmandu yimti nung tentetba parliament kilung nung agiba Tir election nung vote agütsüba sülen la teka anünglen metongloktsüba noksa nung angur. (Kathmandu, October 28)

 Kathmandu, October 28 (Agencies): Nepal parliament-i taoba September ita agizükba linük temzüng tasenba nung ajemdaker Communist Party of Nepal (Unified Marxist Leninist) yimtenren telok nung Vice Chairperson, Bidhya Bhandari par Tir tasenba inyaktsü asoshi tanü Bodbar nü shimogo.

Tesüiba communist lenir, asür Madan Bhandari kinüngtsü, Bidhya-i tanü vote 327 ngua vote 214 angusang, Nepali Congress yimtenren telok nungi Tir candidate, Kul Bahadur Gurung den temaba jenjang ngua Nepal Tir tasenba akümtsü jenjangji angu.

Bidhya-i 2008 küm nungi tenzüka Nepal Tir menden abensang, Ram Baran Yadav melenzüka Nepal indang mezüngbuba tetsür Tir küma otsü tasen ka yanglur lir.

Nepal Tir, Tatong Tir, Ato Kilonser, Parliament Speaker aser Deputy Speaker tekaraba mapang nung shimtsü asoshi taoba September ita 20 nü agizükba Republican Federal Constitution tasenba nung latetba ama, parliament züngsemtemi tanü vote agia Bidhya ya shimer lir.

“Nepal Tir tasenba inyaktsü asoshi Bidhya Devi Bhandari shimogo,” ta parliament speaker, Onsari Gharti Magar-i tanü sangoktsü.

Nepal nung chubayimli agiena democracy yimsüsütsü yimya benshitsü asoshi nokdaker, Bidhya-i aiwa mapang nungi tenzükba Nepal’er yimtenren sabang nung shilem agia aru.

Ajisüaka, la kinüngbo, Madan 1993 küm gari tsüktepba lendong nung tsükseta asüba sülen ang tanur 2 tetsü, Bidhya-i parliament züngsem akümtsü maongka ngua Nepal’er yimtenren sabang nung tongti shilem agitsü tenzük.

Ano külen, küm 2 atema dang Nepal Tir menden bendaktsütsü asoshi Yadav shim saka linük temzüng tasen latettsü ken o nung ajemdaker nüburtem rong nung mangatettep tulu adoka tensa mejungi akümba yong pai tanü ang Tir mendenji toktsütsüa aküm.

Arishi küm 54 tain Bidhya-i tanü Tir menden benokba sülen Nepal parliament indang mezüngbuba tetsür Speaker, Magar sülen anidaka, Nepal’er yimtenren sabang nung tongti shilem agir tetsür tanabuba akümer lir.

Linük temzüng tasenba nung latetba ama, parliament züngsemtemisa Nepal Ato Kilonser tasenba, KP Sharma Oli-ia tan October ita shimogo.