Big B-i tiger conservation rally tenzüktsü

October 24, 2015: Bollywood nung nüngtugu actor Amitabh Bachchan aser Maharashtra Finance minister Sudhir Mungantiwar nati tanü, Honibar nü bike rally sentong tenzükja liasü. State nung keyi wazüka ayuba arem trok rongnungi tesem pezü amshia ‘Save Tiger’ sentong nung ajemdaker iba bike rally ya tenzük.
Keyi kümzüka ayuba tsütsü tangatetba agütsüba nung yaritsü asoshi aser item shiruru ajanga chiyungtsü achiba yimya (food chain) nung teyari agütsüba nüburtem nem angatetdaktsütsü asoshi iba rally ya ayongzükba lir.
Big B-i iba rally tenzüktsü aser item bikers temi Maharashtra nung keyi kümzüka ayuba tsütsü onok sentong nüburtem nem sangoktsütsü, ta Mungantiwar-i suburban Juhu nung aliba Bachchan indang office ‘Janak’ nungi anepdang 7:00 ako nung rally tenzükba mapang metetdaktsü.
Pai, iba rally ya tenet nü asoshi alitsü aser iba mapang Melghat, Pench, Navegaon-Nagzira aser Tadoba-Andhari Tiger Reserves tem semdangtsü. Tan rally nung eco-tourism-a ajungkettsü aser ibaji ajanga tarutsü nung nüburtem mapa anguba nung yaritsü, ta shisem.
Tan rally nung ‘Riding Knights’ telok nungi parnok nisung 23-i shilem agidar aser parnok ajak ya ‘corporate sector’ nung inyakertem tesa lir. Parnoki yimtsüngtem semdangba mapang yimtak alirtem tanginübatem bendentsü aser iba dakji ajemdaker terenlok mapa inyaktsü, ta Mungantiwar-isa ashi.
Mungantiwar, “Item bikers tem yagi sentong tajung ayongba angashia onok den arua ajurutep aser keyi wazüka ayuba nung Forest department den yariteptsü asüngdang,” ta ashi.
2014 census ajanga sayuba agi Maharashtra nung keyi 190 lir.