Big B Maharashtra ‘Tiger Ambassador’ asütsü

Mumbai, August 11 (Agencies): Bollywood nung kanga dang nungtügü actor Amitabh Bachchan-i kiyi kümzüka ayuba nung shilem agitsü. Maharashtra sorkari kiyi kümzüka aser wazüka ayuba nung ambassador asütsü asüngdangba nung arishi küm 72 tain actor, Amitabh Bachchan-i hai ta nangzükogo, ta Hombar nü Finance & Forests Minister Sudhir Mungantiwar-i ashi.

Amitabh-i pa dang asüngdangba nung mulunga nangzükba shidi ka state sorkar dangi yokogo.

“Nai züluba shidi ajanga ni kanga ajangzükgo. Kiyi kümzüka aser wazüka ayutsü maparen dang masü saka iba dak sentakba nung nüngdakba mapa tilalatem dena angazükogo,” ta Amitabh-i Mungantiwar dangi zülu.

“…kü nem state sorkari kiyi wazüka aser kümzüka ayuba maparen nung shilem agitsü maongka agütsüba ni agizüker. Iba shidi ya Maharashtra nung ni Tiger Ambassador asütsü mulunga nangzükba küli ka ama lir,” ta Amitabh-i shisem.

Mungantiwar-i July 29 nü Amitabh aser Bharat Ratna Sachin Tendulkar na dangi state sorkar kiyi wazüka aser kümzüka ayuba nung brand ambassador asütsü atema asüngdanga shidi ka ka yoka liasü.

“Amitabh nüngtugu jenjang aser nüburtemi pa meimba ajanga iba maparen kanga tashi ita nunger otettsü aser state nung aliba nüburtem dang kiyi wazüka aser kümzüka ayubaji kanga nüngdak ta osang agütsütettsü,” ta Mungantiwar-i ashi.

“Onoki tena iba mapa nung brand ambassador südaktsüner. Iba den külemi tenaprongla ni aliba district, Chandrapur nung Tadoba-Andhari Tiger Sanctuary semdangtsü asoshi jaokogo,” ta World Tiger Day amungnü Mungantiwar-i media dang ashi.

Maharastra nung ‘tiger sanctuary’ pongu tashi lir, iba sülen Madhya Pradesh nung pezü, Chhattisgarh nung asem aser Telangana nung ka ta lir.

State pezü nung kiyi kümzüka ayuba mapa tali renloka oa inyaktettsü asoshi Maharashtra sorkari centre dang sen-o-tzü tali agütsüsemtsü asüngdangogo.

Mungantiwar-i ashiba agi Vidarbha, Maharastra ya linük nung ‘tiger capital’ akümtsü tashi lir. 2006 küm iba tesem nung kiyi 169 liasü saka 2014 tashi nung 190 kümogo. Linük nung tang tashi nung kiyi ajak agi 2,226 lir.