Big B mulungsentsü kanga junger aser tashi tait:Anil Kapoor

Mumbai  November 20, 2015: Actor Anil Kapoor-i nüngtugu Bollywood actor, Amitabh Bachchan ya nübur rangben ajungmesor ka aser pa mulungsentsü kanga tashi tait, koba ajanga tangar dang nungi pa balaka bendangteter, ta ashi.

“Amitji (Bachchan) ajanga ni kanga ajungmeso. Ni teti iba o shia liasü aser tanga ashir kechiba süra ni pa mulungsentsü ajungba jangja metet. Tesüiba, tang aser tarutsü mapa ajak nung pa mulungsentsüsa tajungba aser tashi taitba asütsü,” ta Mumbai nung Shilpa Shetty-i züluba “The Great Indian Diet” kaket sayaba mapang Anil Kapoor-i ashi.

Pai, “Amit-i pa sasa azüoka litetba aser pa yimyaliro ajungba dak ajemdaker asenok ajak pa ajanga ajungmesotsüla. Nibo pa dang nungi angazüktsü kanga jangrar,” ta shisem.

“Pa kija aser lokti nung shilem agiba ajak nungi ni angazüktsü kanga jangrar. Asenoki pa ama litettsü lenmang pa dang asüngdangtsü nüngdaker. Pa kechi lokti nung dendir dena ka pai tatishitsü tajung asenok ajak dang sayur. Asenok pa dang nungi angazüktsü aika lir,” ta paisa ashi.

“Slumdog Millionaire” nung shilem agisang, Anil asoajen ajungba aser arshi küm 58 süaka kanga tain meshisangba atema aikati nükshia aser tushia jembir.

Ajisüaka pai, temang anema alitsü asoshi teinyaktsü aika lir, ta ashi.

“Ni tambur kümdar. Ajaki ibaji meteta lir aser nia meteta lir. Ni tambur akümba ni memimshitet. Tambur akümdang joko tain akümera na! ta shisa bulua bilembaji tain akümba mapang mezüng shirang lir,” ta Anil-i ashi.

Anil Kapoor-i, “Ni atemabo ibaji kangbo tebilemtsü mali. Pei libaliro aser mulungsentsü dak tuluka keta lir. Ni tangari jembiba kanga angar aser anganer. Ni anogo shia tangazükba tasen angur. Ni kanga angazükner aser tashi temetet kümner,” ta ashi.