Bihar ajanga Gujarat model tembangba temaitsü sayuogo: Ahmed

Vadodara, November 21 (Agencies): Senior Congress lenir Ahmed Patel-i, tawa Bihar assembly election nung BJP-i tamakok anguba ajanga BJP indang ‘Gujarat model’ tatembang kati aruogo, ta ashi.

Paisa, Bihar aser Delhi assembly election na nung tamakok ajanga BJP jenjang mejungi akumba sayur, ta ashi.

Pai ashiba agi, Gujarat nung taruba local bodies elections ji 2017 assembly election atema “semi-final” ka lir aser  Gujarat nung chief minister Anandiben Patel’er sorkar tatembanglen kati arudar.

“Iba ya Bihar kija nung masü saka Ato kilonser Modi’er (Lok Sabha) constituency,  Varanasi nung tawa local bodies election nunga kasa lir,” ta pai ashi.

“Ato kilonser, shibai par party-i local body election tila ka nung danga takok angu nunga twitter ajanga jembia liasü, par kishilen tamakok anguba mapang nungbo pai ola madoki alir. Gujarat nüburtemi par (BJP indang) model dang tatem salem ashitsü mapang tongogo,” ta Congress lenirisa ashi.

November 22 nü municipal corporations trok-Ahmedabad, Surat, Rajkot, Vadodara, Jamnagar aser Bhavnagar nung election agitsü, district panchayats 31 nung election agitsü, taluka panchayats 230 aser municipality 56 nung November 29 nü election agitsü.

“Küm 20 tashi Gujarat yimsüsürtemi state nung smart city kata mayanglutet aser tang parnoki taruba küm 5 tsüngda linük nung smart city 100 yanglutsü indang jembir,” ta Patel-isa BJP aitsüogo.