Bihar Angh atema Satya Pal Malik tenangzükba agi

Patna (Bihar), October 04 (Agencies): Bodhbarnü Raj Bhawan, Patna nung Bihar Angh menden atema Satya Pal Malik tenangzükba agiogo; Patna high court chief justice, Rajendra Menon-i ketdangsüa pa nem tenangzükba agidakja liasü.
Tenangzükba agiba sentong nung Chief Minister, Nitish Kumar, Deputy Chief Minister, Sushil Kumar Modi, Bihar legislative assembly Speaker, Vijay Kumar Choudhary aser legislative council chairman, Awadhesh Narain Singh nunger den tongtibang nisung aika dena liasü.
Tang linük Tir teinyakdak, Ram Nath Kovind ya Bihar Angh inyaka liasü, ajisüaka taküm pa BJP nungi Tir candidate atema shimba sülen West Bengal Angh, K N Tripathi-i Bihar Angh mapa repsema bena liasü.
Malik ya Uttar Pradesh kübok Baghpat district nungi lir. Pa ya law graduate ka lir aser 1970s mapang nung pa UP state legislative Assembly züngsem ka küma yimtenren nung ajemok.
1989 küm pai Janata Dal ticket nungi toktepa Aligarh Lok Sabha constituency nungi takok angu. Pa Rajya Sabha züngsema anabenren inyakogo.
Malik ya BJP national tatong Tir teinyakdak liasü, aser taoba mapang nung pa Union Minister of State for Parliamentary affairs & tourism-a inyaka liasü.
Arishi küm 71 Malik ya 1946 küm July 24 nü aluyimer kibong ka nung aso.
Pai Meerut University nungi B.Sc aser LLB degrees angu aser Indian Parliament-i ketdangsüba Institute of Constitutional & Parliamentary Studies nungia parliamentary affairs diploma ngua liasü.Tanep pa Patna airport tonga arudang chief minister-i anir cabinet züngsemtem, assembly speaker aser sorkar ketdangsertemi pa agizüka liasü.