Bihar assembly election nung vote shilem 55 agütsüogo

Gaya, October 16, 2015: Hokolbar nü Bihar assembly election tanabubaren nung vote agütsütsü asoshi Gaya, Bihar nung tetsür-tebur tarensen balala noktaka aliba noksa nung angur. Tanü vote agütsütsüpur shilem 55-i vote agütsüogo, ta Election Commission-i metetdaktsü. Vote agütsür tebur dang nungibo tetsür shilem 5 agi timba liasü.

Patna, October 16 (Agencies): Vote magütsütsü atema Maoists telungpurtemi amokmerena liaka tanü Hokolbar nü Bihar Assembly election tanabubaren nung nübur jenti polling station-i arua vote agütsüogo.

Tanü constituency 32 nung election agiogo aser item rongnung constituency 23 bo Maoist telungpurtemi timtem agütsüba tesemtem lir.

Tanü tetsür vote agütsür shilem 57.5 aser tebur shilem 52.5 liasü, ta Election Commission (EC)-i ashi.

Bihar assembly election tanabubaren nung vote agütsür shilem 55 liasü, ta Dy Election Commissioner, Umesh Sinha-i ashi.

Maoists telungpurtemi timtem kanga agütsüba tesem, constituency 11 nungbo nikongdang 3:00 ako tashi nung vote agütsüba maparen tembanga liasü aser tanüngba constituency tem nung 4:00 ako nung vote agütsüba maparen tembanga liasü.

Ano tanga osang ka nung, Bihar Chief minister Nitish Kumar pusemsang, AAP tongti lenir aser Delhi Chief minister Arvind Kejriwal-i, Nitish Kumar-i takok angutsü aser Ato kilonser Narendra Modi-i aniba BJP-i tamakok angutsü, ta shiogo.

“Ni osang agidangba agi, Modi-i Bihar election nung tamakok mejungi ngudagi. Nitish-i election takok ngudagi,” ta Kejriwal-i twitter ajanga ashi.

August ita Delhi nung senden ka aliba mapang Kejriwal-i Bihar CM Kumar pusemtsü ta sangdonga liasü, ajisüaka Bihar nung nüboyim sentong nungbo pai shilem magi.