Bihar Assembly nung NDA züngsentem medeni ao

Patna, December 08 (Agencies): State Angh-i jembiba o lemteptsü mapang Chief Minister Nitish Kumar-i langzüba o ka agi mepelaba ajanga BJP-i aniba NDA züngsemtem Bihar assembly nung medeni ao.
National Democratic Alliance (NDA) züngsem rongnung ka dang chief minister-i, state rangben ozüng kübok alitsü aser ozüng alema inyakertem asoshi sorkari tapet temerenshi agüja arudar, ta ashiba mapang parnok assembly nungi nokdaker ao.
16buba Bihar legislative mezüng senden taoba hopta nungi tenzüka amenba mapang opposition lenir Prem Kumar-i tasüngdangba ka asüngdangba nung Nitish Kumar-i, “Bihar nung ozüng shitak amshir aser iba yimyaji kecha agia memelenshitsü. Ozüng alema inyakertem nem sorkari memunui tapet temerenshi agütsütsü,” ta Mongulbarnü langzüa liasü.
Nitish Kumar-i, taoba ita auyar aoba, küm 2,600 tejen, ‘Lord Mahavira’ indang süngyanglu ka ananü tejakdak police-i nguteta lir. Police temi iba ama mapang tajung inyaktetba asoshi tenüngsang agütsütsüla. Police-i iba süngyanglu auyartem pua arua ken o tembangogo, ta pai ashi.
Senden nung Prem Kumar-i state nung aliba aluyimertem nem sen talila magütsüba ken o ka benoka liasü.
Opposition züngsemtemi state sorkar anema yimyim ayima senden nungi nokdaker ao.