Bihar CM-i Modi dangi taitsüba shidi ka yimjak nung zülu

New Delhi, August 05 (Agencies): Bihar nung nüboyim sentong ka aliba mapang Ato kilonser Narendra Modi-i Bihar Chief Minister Nitish Kumar aija ‘DNA’ olen jembibaji pai meyipa agitsüla ta Kumar-i Modi dangi yimjak nung shidi ka züluogo.

Nitish-i shidi ajanga Modi dang, “Tawa nüboyim sentong ka nung nai kü DNA indang oren jembiba ajanga ni densema nübur aika melung yirutsüogo,” ta ashi.

“Nü oren ajanga Bihar nübur dang masü saka state adener alirtemia mezüngmeshia bilemer,” ta Bihar CM-i ashi.

Modi-i melung yiruja alir ajak tenüng nung pai iba shidi zülur, ta paisa ashi.

“Nai amshiba orenji nü menden (Ato kilonser) den meputep,” ta Nitish-i ashi.

Bihar CM-isa, Bihar anema BJP lenirtemi jembiba ya tang mezüng masü, ta ashi.

Nitish-i Modi dang, taoba Lok Sabha election nung Bihar nüburtemi pa koma yari, ibaji bilemtettsüla, ta ashi.

Item ama oren ajanga state nüburtemi joko temelung alemba ajema akümer aser ner party-i Bihar anemba sayur, ta paisa ashi.

Shidi tatembang nungji Nitish-i Modi dang, pai jembiba oji meyipa agitsüla, ta mepishiogo.

“Nai yamaji inyakba ajanga nüburtemi na taliba akhüm tsübutsü aser state nung na nüngtuguba akümtsü,” ta paisa shisem.

Kobi melii Bihar nung assembly election agitsü, aser iba election asoshi party temi nüboyim sentong tenzükogo.

Tawa Nitish-i, pa election nung metokteptsü, saka election nüboyimba nungang mapang peria agütsütsü, ta sangdongogo.