Bihar CM Kumar JD(U) Tir shimogo

New Delhi, April 10 (Agencies): Deobarnü National Council senden amendang Bihar Chief Minister, Nitish Kumar Janata Dal (United) Tir shimogo.
Arishi küm 68 Sharad Yadav-i asembenren tashi JD(U) Tir inyakba sülen pa iba menden nungi alua liasü.
Tang mezüng Bihar nungi JD(U) tongti Kumar Tir shimogo. Tamalen Tir ana-  George Fernandes aser Sharad Yadav naprongla tanga state nungi liasü.
Sanen luden senden nung Tir atema Yadav-i mezüng Kumar tenüng benok aser iba sülen party secretary general, K C Tyagi, general secretary Javed Raza aser tangartemia agizük ta, party osang ka ajanga ashi.
2014 küm Lok Sabha election nung JD(U)-i tamakok mejungi anguba sülen yaküm Bihar Chief Minister Kumar-i takok tulu ngua liasü, aser pai  khuret tasenba agizükogo, ta Tyagi-i ashi.
Yaküm state assembly election nung JD(U)-RJD-Congress teloktepi BJP-i aniba NDA madak takok tulu ngua liasü aser Kumar-i ashiba agi, par party-i lokteptsü atema Ajit Singh-i aniba party, RLD aser taoba Jharkhand Chief Minister Babulal Marandi’er party, Jharkhand Vikas Morcha den jembidar.
Yaküma SP densema Janata Parivar party tem lokteptsü atema jembia liasü ajisüaka SP tongti, Mulayam Singh Yadav-i iba nungji medeni par party kijai assembly election nung toktep.
Sangküm Uttar Pradesh nung state assembly elections ya kanga tongtibang asütsü ta JD(U)-i bilemer, kechiyong 2019 küm Lok Sabha elections lir, ta Tyagi-i ashi.
“Onoki Bihar nung parnok (BJP) nokdangtetogo aser ano UP assembly election nunga parnok nokdangtsü atema inyakdar,” ta paisa ashi.
Samajwadi Party den lokteptsü atema JD(U)-i ano merangdangtsü asü ta asüngdangba langzüdang Tyagi-i, Mulayam Singh Yadav aser BSP tongti, Mayawati naprongla election nung parnok kijai tokteptsü ta shiogo, ta metetdaktsü.
Party osang ajanga ashiba agi, party tongti, Kumar kübok party-i teloktep atema inyaktsü aser Lok Sabha election nung opposition party tem longjemer Modi anema tokteptsü.
Tir atema shimba sülen Kumar-i, “Sharad Yadav mapatem ni tejakleni bener aotsü aser JD(U) Tir shilemji ni agizüker,” ta ashi.