Bihar CM Nitish Kumar-i o tokteptsü atema BJP jazüker

Patna, September 15 (Agencies): Patna nung Mongolbar nü Bihar chief minister Nitish Kumar-i sabang mashi ka nungi yimjak nung o tokteptsü atema BJP jazükogo.

“Ni BJP toktsüba sülen terenlok nung atsüngzükogo aser Bihar nung arem yimsüsüba lir ta nisungtemi jembitsü ya fashion ka ama kümogo. Yimjak nung o tokteptsü atema ni item o jembirtem (BJP) jazüker,” ta Nitish-i ashi.

Ato kilonser Narendra Modi-i arem yimsüsüba aser ozüng alema inyakbatem tali kümogo ta jembir ajisüaka 2002 küm Guijarat nung atalokba indangbo mejembir, ta JD(U) lenir aser Bihar CM Kumar-i aitsüogo.

Nitish-isa Bihar nüburtem dang, taruba assembly election nung nüburtemi vote kanga kümdanga agütsütsüla mesüra tesülen parnoki takoksa ajurutsü, ta tekümdangtsü o ashi.

Nitish-i, “Mapa agi inyaktettsü tenangzükbatem ang ni nangzüker. Ni kodanga yazü menangzüker aser tesülen election mapang jembiba o, ta mashir,” ta ashi.

Yashi New Delhi nung BJP Tir Amit Shah-i, “Bihar terenlok dak sentakba nung ni ya jangjajangja ashir, Nitish Kumar-i terenlok agütsübaji pa BJP den atenba mapang tashi dang liasü. Osang tai ajanga pai Bihar nübur anisar,” ta aija liasü.

“Ato kilonser Narendra Modi-i Bihar atema senotsü teyari sangdongogo, ajisüaka iba atemaji Nitish Kumar-i pa dang pelaba melemsatep,” ta Shah-isa aija jembiogo.