Bihar CM, Nitish Kumar-ia Pegasus ken o bushisüngdangtsü akhanger

Patna/New Delhi, August 02 (Agencies): Opposition party temi Pegasus mangatettep ken o bushisüngdangtsü akhangba pusema Hombarnü Bihar Chief Minister aser JD(U) lenir, Nitish Kumar-ia iba ken o bushisüngdangtsüla, ta takhangba agütsüogo.

JD(U) ya BJP-i aniba NDA teloktep sorkar nung densema lir, ajisüaka Kumar-ia iba ken o ya bushisüngdangtsü nüngdak, ta metetdaktsü.

Bihar yimtiba, Patna nung osangbenertemi asüngdangba langzüdang Nitish Kumar-i, “Atangji iba ken o ya bushisüngdangtsüla,” ta langzü.

JD(U) leniri, “Atangji iba onük nung o lemteptsüla aser bushisüngdangtsüla. Iba osang ya nübur nem metetdaktsütsüla,” ta ashi.

Kumar-i, “Phone ajanga itdangitba mangatettep ken o ya anogo aika jembia arudar. Iba onük ya Parliament nung süokogo aser osangkakettem nunga adoker. Anungji iba onük nung o lemteptsüla aser bushisüngdangtsüla. Iba dak sendakba osang tejangja nübur nem yimjak nung metetdaktsütsüla,” ta ashi.

NDA teloktep nung densema aliba party tem rongnung tang mezüng JD(U)-i Opposition-i Pegasus spyware ken o bushisüngdangtsü akhangba pusemer.

Alima tesem balala nung media house 17-i, Israel nunger company NSO-i ayokba Pegasus spyware amshia India densema linük balala nung meimchir temeden atema inyakertem, osangbenertem, lawyers aser tongtibang nisungtem noklang aika phone ajanga itdangitogo, ta osang prokba sülen India nunga opposition party temi Parliament nung iba onük benoka o lemteptsü aser iba ken o bushisüngdangtsü akhanger.

Ano külen tanga osang ka nung, Pegasus ken o atema o lemteptsü asoshi Congress lenir, Rahul Gandhi-i Mongolbarnü opposition party balala nungi lenirtem senden ka ayongzükogo.

Pegasus ken o nung opposition party tem ka küma longjemer obang ka asütsü nükjidong nung Rahul Gandhi-i Constitution Club nung iba sendenji ayongzük.

Iba senden nung adentsü atema party balala nungi opposition MP tem jaokogo.

Opposition party temi iba ken o ya Parliament nung benoka o lemteptsü atema akhanger, saka sorkari iba ya tongtibang onük ka masü, ta shia opposition-i akhangba magizüker.

Rahul Gandhi-i ayongzükba senden balala nung Trinamool Congress-i medeni arudar, ajisüaka Mongolbarnü ayongzükba senden nung adentsü atema parnok nema tejaokba shidi agütsüogo.

Iba ken o bushisüngdangtsü atema takhangba agüja Supreme Court nung temepishiba ken o asem benoka lir, aser item temepishiba ken o August 5 nü angadangtsü.

Temepishiba ken o asem agütsürtemji senior journalists N Ram aser Shashi Kumar na, advocate M L Sharma aser CPI(M) Rajya Sabha MP John Brittas nunger lir.