Bihar CM, Nitish Kumar indang convoy amak

New Delhi, January 12 (Agencies): Hokolbarnü Bihar, Buxar district kübok Nandar nung sentong ka aliba mapang nung yimdaklirtemi Bihar Chief Minister, Nitish Kumar indang convoy amak, ta tanü osang ka ajanga metetdaktsü.
Yimdaklirtemi Chief Minster amenba gari aser pa meinba garitem dak long onloktsü, aser iba tatalokba nung chief minister bo meyiru, ajisüaka security sepaitem kar yiruogo, ta kasa osang ajanga ashi.
Ajisüaka Kumar-i mejashii Dumraon block nung ayonga akaba sentong nung jembidang pai, “State nung terenlok mapa inyakba ajanga nisung karbo meinpronger. Nisung karibo yazü jembir aser tangartema jashidaktsütsü meranger, ajisüaka item ama tilateri tatalokba ajanga nüburtem jashia malitsüla,” ta ashi.
Iba yimtsüng nung chief minister-i sen crore 272 indang scheme 168 tenzükja liasü.
Tang Chief minister, Nitish Kumar-i “Vikas Samiksha Yatra” (sorkar indang terenlok schemes tem reprangshiba aser asadangba sentong) yaküm December 12 anogo nungi tenzüka state tesem ajak sema tesenzüdak lir.
Tan ita tetenzüklena Saharsa district nung lanur telok kati Chief Minister dang wako tanak ayiplokja sayu, iba sülen police-i lanurtem anema apusotsü tenzük, ajisüaka CM-i police sota liasü.
Saharsa district kübok Sulindabad yimdak lanur parnok 4-5-i Chief Minister, Nitish Kumar dang wako tanak sayua liasü, ajisüaka Nitish-i, “Tanak sentsü nung kechi tai ali. Iba ya sentsü tajung ka lir. Melung masürtem aliba ajanga democracy nung tebor ajungba sayur,” ta ashi.