Bihar Education Dept.-i ‘Operation Clean Up’ tenzük

Patna, June 12 (Agencies): Tawa Bihar nung Class 12 Board tatidang merit list nung ochimashi ken o tulu adokba sülen Bihar Education department-i state nung shisaliok tajung agütsütsü atema ‘Operation Clean up’ tenzükogo.
Yangi osangbenertem den jembidang Education Minister, Ashok Choudhary-i, “State nung shisaliok jenjang asüngteta ayutsü atema onoki (education dept) ‘Operation clean up’ tenzüker. B.Ed college tem (nija) inyakyim nung tashishiba osangtem onoki nguogo, B.Ed college 228 prongla onoki bushisüngdangtsü. Item college mita reprangtsü atema onoki District Magistrates aser SP ajak dang tuyuogo,” ta metetdaktsü.
DMs aser SPs senteper B.Ed college tem mita reprangtsü aser item collge nung kaketshirtem aser tesayurtem kwi ali, infrastructure facilities aser class teti agir asü masü item osangtemji parnoki agütsütsü, ta minister-i ashi.
“B.Ed course shisaliok tajung agütsütsü atema onoki inyaktsü, iba sülen onoki (department) class 10+2, degree college tem aser coaching institute tema mita reprangtsü. Secular teloktep sorkari shisaliok tajung agütsütsü atema inyaktsü,” ta paisa ashi.
Tesayur ka tenüng college aika nung faculty züngsem lir ta tai tonglokja aliba dak sentakba nung minister-i, department-i item college 288 nung shima aliba tesayurtem dang ‘Aadhaar’ (card) agütsütsü tuyuogo, ta ashi.
Taoba hopta toppers-tem dak aketba  ochimashi ken o adokba sülen maneni affiliate asüba college aser school temi sorkar senotsü tim mesüi amshiba osang jungkai adoka lir.