Bihar election atema JD(U), RJD, Cong tsüngda menden lemsaogo

Patna, September 19 (Agencies): Menden 243 aliba Bihar assembly election atema secular teloktep party tem tsüngda menden lemsaba maparen Honibar nü tembangogo.
State nung tang tashi nung aliba Janata Dal(United)-i menden 101, Rashtriya Janata Dal-i menden 101 aser Congress-i menden 41 nung tokteptsü.
Tanü Patna nung külem osangbenertem senden ka nung JD(U) state Tir, Vashisht Narain Singh-i iba sangdong agüja liasü, saka party kati-a election nung tokteptsüpur candidate tem tenüngbo mesangdong.
“Menden alemba maparen temogo. Bihar assembly election nung onok nisung shia tokteptsü menden takok ngua jangjaogo,” ta Singh-i ashi.
JD(U) aser RJD nati candidate 24 dak tema nem party temaitsü lemzüktsüogo, ajisüaka parnok tenüngbo yimjak nung mesangdong.
Bihar nung October 12 nungi November 5 nü tashi nung telemsa pongu nung assembly election agitsü.