Bihar election atema SP-i candidate tem sangdongogo

Patna, October 07 (Agencies): Bihar assembly election atema tanü Samajwadi Party (SP)-i candidate tenüng 79 sangdongogo, aser item candidate temji election telemsa asembuba, pezübuba aser pongububa atema lir.
Tanü iba sangdong agütsüdang Party tatong Tir aser Rajay Sabha MP, Kiranmoy Nanda-i, Bihar assembly menden 243 nungi party-i menden 146 nungi tokteptsü, ta ashi.
SP ya party trok teloktep Third Front nung densema lir aser Nanda-i, “Party trok teloktep ya kanga menor ang loktep, anungji menden kar nungbo teloktep party tem tsüngda nunga medemertem ama tokteptsü,” ta ashi.
Iba teloktep nungi chief minister candidate ji NCP general secretary, Tariq Anwar asütsü.
“Tamasabo menden 85 nungang tokteptsü onok sentong liasü. Tang teinyaktak aser taoba MLA temi onok dang ticket meshiba ajanga onoki menden 146 nung tokteptsü lemtet,” ta Nanda-i ashi.
SP-i tang teinyaktak MLA aser taoba MLA 30 nem party ticket agütsüogo.
Bihar assembly election October 12 nungi agitsü aser November 08 nü vote azüngtsü.