Bihar election nung BJP-i tamakok angutsüji tongtibang: Kejriwal

New Delhi, November 04 (Agencies): Tanü Delhi Chief Minister, Arvind Kejriwal-i Bihar aasembly election nung BJP-i takok angutsüji kanga tongtibang, kechiyong ibaji ajanga linük nung tesempatep yimtenren maparen ajanga kecha majangzüktsü ta parnoki (BJP) metettsü, ta ashi.
“Iba linük nung tesempatep yimtenren inyakyim ajanga kecha majangzüktsü ta parnoki (BJP) rajema arutsü atema Bihar nung BJP-i tamakok angutsüji kanga tongtibang,” ta AAP tongti lenir aser Delhi chief minister Kejriwal-i twitter ajanga ashi.
Tamalen Delhi nung senden ka alidang Kejriwal-i Bihar state Chief Minister aser Janata Dal-United lenir, Nitish Kumar pusemer ta sangdonga liasü aser tanüa pai maneni nüburtem dang Bihar nung Kumar nem vote agüjang, ta mepishiogo.
“Nisung ajaki Bihar nung aliba kinüngertem aser medemertem dangi call süa parnok dang Nitish Kumar nem vote agüjang ta ashitsü ni ajak dang mepishir,” ta pai Hindi oshi agi twitter ajanga mepishi.
Asüng Bihar assembly election agiba tembangtsü aser November 8 nü vote azüngtsü.
Kejriwal-i Kumar pusemaka tanü tashi pai Bihar nüboyim sentong ka nunga jembia mali.