Bihar election nung SP, NCP aser SJD-D-i Third Front ama tokteptsü

Lucknow, September 17 (Agencies): Bihar election agitsü mapang ana nung lia tanü Samajwadi Party-i sangdong ka ajanga, taruba Bihar Assembly election nung parnoki Samajwadi Janata Dal-Democratic, NCP aser National People’s Party (NPP) den senteper tokteptsü, aser ibaji NDA teloktep aser secular teloktep sülen tasembuba telok (Third Front) ka ama asütsü, ta metetdaktsüogo.

Tanü Lucknow nung osangbenertem senden ka nung item party ajak nungi lenirtem lia National General Secretary Ram Gopal Yadav-i, “Bihar Assembly election nung onoki taoba Union Minister Devendra Prasad Yadav-i aniba SJD-D, NCP aser taoba mapang Lok Sabha Speaker P A Sangma-i aniba NPP den senteper Bihar nung Third Front ka ama tokteptsü,” ta ashi.

“Asüng Patna nung Third Front, coordination committee senden amenba mapang Bihar nung mezüngbubaren election nung tokteptsüpur candidate tem shimtsü,” ta SJD-D tongti lenir Devendra Yadav-i ashi.

Bihar nung October 12 nü Assembly menden 49 atema election agitsü aser iba atema tokteptsüpur tenüng agütsütsü tatembangbuba anogoji September 23 nü lir.

Taoba Rastriya Janata Dal (RJD) lenir Raghunath Jha, shiba tawa SP nung denogo pai, party nung angutsü tim akhüm manguba ajanga pai Lalu Prasad’er party toktsü, ta ashi.

Paisa, “Iba party nung agizükba atema ni Mulayam Singh Yadav dang pelar,” ta ashi.

Iba Front nungi chief minister candidate shiba asütsü ta osangbenertemi asüngdangba langzüdang Ram Gopal Yadav-i, tang tashi nungbo ibaji melemtet, ta ashi.

Jha dak alia JD(U) MLC, Munna Singh-a SP nung denogo.

Bihar nung assembly election October 12 aser November 5 nü na tsüngda telemsa pongu nung agitsü, aser iba election nung Ato kilonser Narendra Modi lenisüba nung NDA-i tokteptsü aser Chief Minister Nitish Kumar-i RJD aser Congress den senteper tokteptsü.