Bihar election nung tamakok atema Manjhi-i RSS nem tai tongloktsü

Patna, November 09 (Agencies): Bihar election nung BJP-i aniba NDA teloktepi tamakok anguba dak sentakba nung tanü taoba Bihar chief minister aser HAM Tir, Jitan Ram Manjhi-i, RSS tongti Mohan Bhagwat-i reservation onük jembiba aser BJP National Tir, Amit Shah-i, Bihar nung BJP-i tamakok ngura Pakistan nung bomb poka pelateptsü ta jembiba otem ajanga vote mangu, ta ashi.

“Bhagwat-i Dalits aser OBCs reservation atema jembiba o ajanga NDA-i takok angutsü aliba jenjang raksa, kechiyong iba ya Grand Alliance (JD(U)-RJD-Congress teloktep) indang tongtibang onük rongnung ka liasü,” ta Manjhi-i Patna nung osangbenertem dang ashi.

Tan Bihar election nung BJP telokep den adenba party, HAM Tir Manjhi-isa, shisaliok rejutem nung reservation onük aser nüburtem atema mapa ajanga Bharatiya Janata Party-i aniba National Democratic Alliance (NDA) mejungi kongshi, ta ashi.

Paisa, Shah-i Bihar assembly election nung BJP-i tamakok ngura Pakistan nung bomb apoktsü ta jembiba ajanga-a NDA tamakok nung tongtibang shilem agiogo, ta ashi.

Item o ajanga Grand Alliance dang yari,” ta paisa ashi.

Manjhi’er party, HAM-i assembly menden 20 nung toktep, ajisüaka parnoki menden ka nung dang takok angu.

Party nungi takok angusangji Manjhi dang liasü. Pai par district Gaya, Imamganj menden nung takok angu.